% 35 igoko zaie hobaria Alde Zaharreko eraikinei eta eraikin babestuei Eraikuntza, Instalazio eta Obren gaineko Zergan.

• % 60ko hobaria izatetik % 95ekoa izatera pasatuko dira; baita Bizigune programan sartzen direnak ere. Irisgarritasun-baldintzak hobetzeko obretan, % 60tik % 90era igoko da hobaria.

• Irabazi-asmorik gabeko elkarteak onuradun izango dira aurrerantzean eraikinak zaharberritzeko obretarako dirulaguntzetan.

Martxoko osoko bilkurako eztabaidagai nagusia izan da Eraikuntza, Instalazio eta Obren Zergaren Ordenantzaren aldaketa; Gipuzkoako Foru Aldundiaren Foru Araura egokitzeko aldaketa, hain zuzen. 

Orain arte, obretarako lau karga-tasa eta horien gaineko hobariak aplikatu izan dira Tolosan: % 5eko orokorra; % 2koa Alde Zaharreko, babes ofizialeko etxebizitzak egiteko eta Bizigunera atxikitako obretarako; % 1 nekazaritza eta abeltzaintza ustiapenetako obretarako; eta % 0ko tasa jarduera ekonomikoari lotutako lokalen obretarako. 

Bada, arauak horrela ezarrita, aurrerantzean, guztiak % 5eko karga-tasa bakarrean bateratuko dira. Hori orekatzeko, ordea, hobariak handitu ditu Udalak, eta zenbait kasutan, orain arteko egoerarekin alderatuta, onura handiagoa jasoko dute obraren sustatzaileek, batik bat, Alde Zaharreko, Bizigune programako eta irisgarritasuna hobetzeko obren kasuan.

Horretarako, interes bereziko edo udal-onurako izendatuko ditu Udalak zenbait kasu, ezaugarri sozial, kultural edota historiko-artistikoak izategatik; baita enplegua sustatzeko baliagarriak izateagatik ere. Laburbilduta:

• Alde Zaharra, Euskal Herria plaza eta Santa Klara: Alde Zaharra Berroneratzeko Plan Integralari eutsiz, zaharberritze-obrek % 95eko hobaria izango dute. Orain arte, % 2ko karga-tasa izaten zuten, % 60ko hobariaren baliokide dena. Hobari hori, hortaz, % 35 igoko da. Oin berriko obrek, berriz, % 60ko hobaria izango dute. Eremu horietako etxebizitzak birgaitu eta eraberritzea da helburua, ingurua biziberritzeko.

• Babestutako eraikinak: Ondarearen Katalogoan jasota dauden edo babestuta dauden elementuetan egindako obrek % 95eko hobaria izango dute. Iaz. katalogoa berritzeko prozesua jarri zuen martxan Udalak, Tolosako 47 eraikinen azterketa egin, eta interes arkitektonikoagatik babesik behar ote duten ikertzeko. Babesak ezar ditzakeen baldintza bereziak orekatzeko asmoz, onura ekonomikoak ezartzen dira jabekideei laguntzeko, hala Tolosako ondare arkitektonikoari balioa emateko.

• Babes ofizialeko etxeak: sustapen publikoko etxebizitzek % 95eko hobaria izango dute. Sustapen pribatuko oin berriko obrek, berriz, % 50ekoa. Orain arte, % 60koa zuten, baina Foru Arauak ez du % 50tik gorako hobaria onartzen.

• Bizigune programa: etxebizitzak konpondu eta alokairura bideratzea du helburu programak. Programara atxikitzen diren etxebizitzetako obrek % 95eko hobaria izango dute. Lehen, % 2ko karga-tasa zuten eta, Alde Zaharrarekin bezala, % 35 igoko da hobaria.

• Nekazaritza eta abeltzaintzako ustiapenetarako obrak: hobari bidez aurrez zuten % 1eko tasa parekatuko da, % 80ko hobaria aplikatuta.

• Jarduera ekonomikoa: lokalak % 100eko hobaria izatetik % 95ekoa izatera pasatuko dira, Foru Arauak ez baitu %100eko hobaria baimentzen. Beraz, ez ordaintzetik ordaintzera pasatuko dira. Dena dela, baimendutako hobaririk altuena aplikatu da, % 95ekoa, betiere 200 metroz azpiko lokaletan eta 50.000 eurotik beherako obretan. 

• Ezintasunen bat dutenen irisgarritasun- eta bizi-baldintzak hobetzeko obrak: % 30 igoko da hobaria, % 60tik % 90era.

• Energia: Autokontsumorako eguzkiaren energia aprobetxatzeko egindako obretan % 95eko hobaria aplikatuko da.

Elkarteak, eraikinak zaharberritzeko obretarako dirulaguntzen onuradun

Osoko bilkuran, dirulaguntzak ere izan dira hizpide. Etxebizitzak zaharberritu, irisgarritasuna hobetu eta efizientzia energetikoa hobetzeko laguntzetan, onuradun berriak gehitzea onartu da, aho batez. Orain arte, etxebizitzak ziren onuradun bakarrak; bada, aurrerantzean, irabazi-asmorik gabeko elkarteek ere jaso ahal izango dute dirulaguntza.

Bide batez, plan estrategikoan partida horretan jasotako kopuruak eguneratu dira. Izan ere, plan hori hiru urtekoa da (2023-2025), eta jatorrizko planean, urte bakoitzeko 120.000 euro aurreikusten ziren, 360.000 euro guztira. Onuradun gehiago izateko asmoz, udal-gobernuak 300.000 eurora arte igo zuen urte bakoitzeko kopurua iaz, baita aurtengorako ere. Kopuru berriak aplikatuta, 720.000 eurora igo da eraikinak birgaitzeko Udalak bideratuko duen dirulaguntza.

Visesarekin hitzarmena

Amarotz paper-fabrika azpiesparruaren urbanizatze-lanak egiteko, Visesa erakunde publikoarekin hirigintza-hitzarmena landu da. Urtarrilean hasierako onarpena eman zitzaion, eta entzunaldi publikoan izan da. Alegaziorik egon ez denez, behin betiko onartu da. 

Hitzarmena sinatu aurretik, VISESAk urbanizazio-kargen zenbatekoaren % 7ko bermea jarri behar zuen, eta jada egin du hori. Hartara, alokairu sozialeko eskaintza handitzeko hurrengo urratsa Tolosako Udalaren eta VISESAren arteko hirigintza-hitzarmena sinatzea izango da.