-
Astelehenetik ostiralera 08:00etatik 21:00etara izango dira zabalik; txartel bidezko sarbide sistema jartzean, asteburuetan ere egongo dira erabilgarri.
-
Erabili ahal izateko, izena eman beharko da Udalaren egoitza elektronikoan edo udaletxean; jada egin daiteke eskaera.
(1).jpg)
Tolosako ikasleek bi ikasgela izango dituzte eskura, bihartik aurrera. Ikasturtearen hasieran abiatu zuen Udalak ikasgela sortzeko prozesua. Orain arte, araudia egiteko eta espazioak atontzeko lanetan aritu da Udala, baita sarbide-sistema eta izen-ematea antolatzen ere, besteak beste. Ikasgela martxan jarrita, azken hamarkadetan izan den eskari bati erantzuna emango dio Udalak.
Rondilla kaleko Gorosabel eraikinaren hirugarren solairuan egongo dira bi ikasgelak (musika-eskolaren goiko aldean, Aitzol udal-euskaltegiaren solairu berean). Behin-behineko kokapena izango da hori, harik eta ikasgelaren behin betiko lekua prestatu arte.
Geletako batek 14 lagunentzako lekua du, eta besteak, 10 lagunentzakoa. Dena den, banaka ikasteko eremua da, eta, beraz, barruan ezingo da hizketan aritu; horrenbestez, ez da talde-lanak eta horrelakoak egiteko lekua. Sareko konexioa eta gailuak kargatzeko puntuak ere badituzte. Hala ere, ezingo dira erabili soinua egiten duen gailuak edo telefonoak.
Orain, astegunetan; gero, asteburuetan ere bai
Oraingoz, astelehenetik ostiralera izango da zabalik, 08:00etatik 21:00etara. Aste batzuk barru, txartel bidezko sarbide-sistema prest dagoenean, asteburuetan ere erabili ahal izango da, 08:00etatik 20:00etara. Unea heltzean emango da horren berri.
Astegunetan, eraikina zabalik dagoenez, ez da txartela erabili beharko. Asteburuetan eta jaiegunetan, bai, sarrerako atea itxita egongo da, eta txartela erabili beharko da. Nolanahi ere, kasu guztietan erabiltzaileek eskaera-orria aurkeztu beharko dute, eta txartela eskuratu. Alegia, nahiz eta erabiltzaile batek asmoa izan astegunetan soilik erabiltzeko, eskaera egin beharko du. Era berean, aste hauetan ere, nahiz eta txartel-sistema jartzeko egon eta soilik astegunetan erabili ahal izan, eskaera egin beharko da.
Txartela eskuratzeko bi bide daude: Udalaren egoitza elektronikoaren bitartez egin daiteke eskaera, lotura honetan sartuz eta eskaera-orria aurkeztuz; bestetik, udaletxean aurrez aurre egin daiteke, UDATEn. Adin txikiko eskatzaileen kasuan, ikasgela erabiliko duenak ez ezik, haren gurasoek edo legezko tutoreak ere sinatu beharko dute eskaera. Informazio gehiagorako, euskara@tolosa.eus helbidera idatzi. Webguneko orrialde honetan ere informazio osagarria argitaratu da.
Behin betiko ikasgela helburu
Aitor Agirresarobe Hezkuntza zinegotziak azpimarratu du espazio hau behin-behinekoa dela, behin betiko ikasgela prestatu artekoa, alegia.
«Espazio egonkor bat sortzea da helburua. Udalak ez ditu eskura aukera asko ikasgela jarri ahal izateko. Ez, behintzat, epe motzean. Zerbitzua ahalik eta lasterren martxan jartzeari eman diogu garrantzia, behin betiko lekua sortzeko aukerek proiektu eta obra handiagoak eskatzen dituztelako, eta horrek asko atzeratu lezakeelako irekiera. Behin betiko espazioa aukeratzeko beste irizpide batzuk ditugu, hala nola kaletik sarbide zuzena izatea eta inguru lasaiago batean kokatzea. Oraingo kokalekuak ez ditu horiek erabat betetzen, baina gehiago ez atzeratzeko hautua egin dugu, urte luzez izan den eskari bati erantzuna eman ahal izateko», azpimarratu du.
Behin betiko espazioaren inguruan, berriz, Andu Martinez de Rituerto alkateak gaineratu Berazubi estadioko sarreran dagoen balio anitzeko gela izan dela orain arteko aukerarik egokiena: «Tolosa CFk kudeatzen du gune hori, jabetza Muñoa Fundazioarena izan arren. Biekin elkarrizketak izan ditugu denbora honetan, eta begi onez ikusi dute proposamena. Leku egokia da ikasgela egiteko, kaletik sarbide zuzena duelako eraikinaren beste bulegoetara sarbiderik gabe, eta inguru lasai batean dagoelako. Trukean, erabilera partekatua izango litzateke, eta, noizean behin, klubak hitzaldi edo batzarren bat egiteko erabiltzeko aukera izango luke. Azken asteotan, ordea, atzera egin du kirol-klubak, hasiera batean aurreikusitakoa baino erabilera handiagoa egin nahi duelako. Uste dugu ikasgelak ahalik eta erabilerarik esklusiboena izan behar duela. Horregatik, beste espazio baten bila ari gara».
