Udalak eta Tolosaldeko Komunikazio Taldeak lankidetza hitzarmena berritu dute, euskararen erabileraren normalizazio lanak bideratzeko

Udalak eta Tolosaldeko Ataria barneratzen duen Tolosaldeko Komunikazio Taldea S.M.-k lankidetza hitzarmena berritu dute. Olatz Peon Ormazabal alkateak eta Xabier Saizar Ingidua Tolosaldeko Komunikazio Taldea S.M.ko lehendakariak izenpetu dute. Urtebeteko epealdia du eta Udalak 91.500 euroko diru-laguntza eman dio komunikazio taldeari.

Helburu nagusi du hedabideen alorrean euskararen erabileran normalizazio lanak bideratzea, ekoizpen ildo ezberdinen bitartez: prentsa, irratia eta internet. Tolosaldeko Ataria egunkari eta astekariak, Ataria irratiak, eta www.ataria.eus guneak osatzen dute proiektu komunikatibo multimedia hau. Aldi berean, lehentasuna da eskualdeko tokiko hedabideekin elkarlan bideak jorratzea.

Alkateak komunikabideek euskararen erabilera eta normalizazioan eragiteko 'garrantzitsu' direla nabarmendu du: “asmo honen zerbitzura, herritarrak euskaraz informatzeko eskualde mailako komunikabide sarea sustatzea da hitzarmen honen xede eta funtsa”.