Tolosaldea Eskola Agenda21: herrira begiratzen duen hezkuntza proiektu sendoa

• Hamaseigarren urtez Tolosan eta bederatzigarrenez Tolosaldean Eskolako Agenda 21 proiektua abian da: 'Lurzorua' dute gaitzat.
• Tolosaldeko 10 herrik parte hartzen dute eta 7.500 ikasle inguruk. Aurten Peñascal Fundazioa estreinatuko da proiektuan.
• Aurtengo edizioari hasiera Lurzoruaren inguruko hitzaldi batekin eman diote. Zizurkilgo Fraisoro Nekazaritza Eskolan irakasle izandakoa eta gaur egun Gipuzkoako gazteak lehen sektorean instalatzeko plana koordinatzen dabilen Jesus Calvilloren eskutik.

Hamaseigarren urtez Tolosan eta bederatzigarrenez Tolosaldean Eskolako Agenda 21 proiektua abian da. “Dagoeneko proiektu sendoa da, bai herri zein eskoletan, bertako egunekotasunean guztiz txertatua dagoena” adierazi dute Tolosako Ingurumen Zentroko teknikariek.

Proiektu honen bitartez herritar gazteenek herriko erabakietan parte-hartzen dute, erabakiak demokratikoki hartzen ikasiz. Betiere ingurumenaren alde eginez.

Tolosaldeko 10 herrik parte hartzen dute TIZek, Tolosaldea Garatzen eta Ingurugela-CEIDArekin batera koordinatzen duten eta hezkuntza komunitate osoa inplikatzen duen proiektu honetan: Tolosa, Ibarra, Anoeta, Irura, Zizurkil, Villabona, Aduna, Asteasu, Berastegi eta Alegia. Guztira 7.500 ikasle inguruk hartzen dute parte: 4.500 Tolosakoak eta 3.000 eskauldekoak. Aurten Peñascal Fundazioa estreinatuko da proiektuan.

Lurzorua izango da 2018-2019 ikasturtean landuko den gaia. “Lurzorua, naturak eskaintzen digun baliabide garrantzitsuenetakoa da, bere eraberritze tasa motela dela eta baliabide ez-berriztagarritzat hartzen dena. Beraz, oso garrantzitsua da lurzoruak babestea” nabarmendu dute Ingurumen Zentrotik.

Aurtengo edizioari hasiera Lurzoruaren inguruko hitzaldi batekin eman diote. Zizurkilgo Fraisoro Nekazaritza Eskolan irakasle izandakoa eta gaur egun Gipuzkoako gazteak lehen sektorean instalatzeko plana koordinatzen dabilen Jesus Calvilloren eskutik gaiaz gehiago jakiteko aukera izan zuten pasa den asteazkenean, urriak 17.

“Hizlariak lurzoruak duen garrantzia behin eta berriro azpimarratu zuen, nahiz eta egungo gizartean erabat ahaztua eta baztertua egon. Lurra euskarri fisiko soil bat baina askoz gehiago da, eboluzionatu egiten duen sistema bizia da. Batez beste, lurzoruak 10.000 urte behar ditu sortzeko eta etengabe mineralak eta materia organikoa kentzen ibiltzeak ondorio kaltegarriak ditu”. Hitzaldia Tolosaldeko EA21 programan parte hartzen duten eskolei eta udal ingurumen teknikariei zuzendua zen.

“Hemendik aurrera lanari ekin beharko diogu ikasturtearen bukaeran emaitzak udal ordezkarien aurrean aurkeztu ahal izateko. Urte hauetan eskolek egindako lanari esker, herri jasangarriagoak lortzen ari gara, baina oraindik lan asko dago egiteko. Aurten ere, lanerako gogoz gaude, denon artean Tolosaldea justuagoa eta jasangarriagoa lortuko dugulakoan” nabarmendu dute TIZeko arduradunek.