Frantziako Charleville-Mézières herriko ordezkariek Tolosako ehun ekonomikoa ezagutu dute senidetze hitzarmena sinatu bezperan

• Bihar, larunbata, sinatuko da bi herrien arteko senidetze hitzarmena.
• Gaur, ostirala, Lehiberri, Tolosaldeko Konpetibitate eta Berrikuntza Zentroa, Cadinox enpresa, Topic zentroa edota Usabal eta Berazubiko kirol instalakuntzak bisitatu dituzte, eta baita hainbat bilera burutu ere: enpresa alorreko eragileekin edota herriko ikastetxeetako zuzendariekin, esaterako.
• Udalak helburu du herri frantsesarekin industria 4.0n, 3D fabrikazio aditiboan, ikasleen elkar trukean, lehen sektorean, gastronomian edota turismoan sakontzea.
• Argazki galeria amaieran.

Charleville-Mézières herri frantseseko ordezkaritza, alkateak, Boris Ravignon, 4 zinegotzik, eta Ardenetako Museoaren zuzendariak osatutakoa, Tolosan da. Iganderarte, azaroak 18, luzatuko dute egonaldia. Bihar, larunbata, sinatuko da bi herrien arteko senidetze hitzarmena. Gaur, ostirala, Lehiberri, Tolosaldeko Konpetibitate eta Berrikuntza Zentroa, Cadinox enpresa, Topic zentroa edota Usabal eta Berazubiko kirol instalakuntzak bisitatu dituzte, eta baita hainbat bilera burutu ere: enpresa alorreko eragileekin edota herriko ikastetxeetako zuzendariekin, esaterako. Tolosako Udalak interesa du herri frantsesarekin industria 4.0n, 3D fabrikazio aditiboan, ikasleen elkar trukean, lehen sektorean, gastronomian edota turismoan sakontzeko. Hitzarmena tarteko, Charlevillek zientzia eta teknologia alorrean duen garapena baliatu nahi da, sinergiak indartuz, herriko industriari aukera berriak izateko aukera zabaltzeko.

Txotxongiloetatik haratago

Txotxongiloak ziren orain arte elkar batzen zituena bi herriak. Charleville-Mézières (Frantzia) hirian ospatzen da bi urtetik behin Munduko Txotxongilo Antzerki Jaialdia, Tolosa parte izan ohi delarik. Baina badira hilabeteak bi herriak beste lanketa batean murgilduta daudena: senidetze hitzarmen ofizial bat landu dute; azaroaren 17an izenpetuko da Tolosan eta urtarrilean Frantzian. Hitzarmenak helburu du bi herriak are gehiago gerturatu, harremanak sendotu eta txotxongiloetatik haratago elkar eragiten dieten gaietan sakontzea.

Lan mahaia sortu zen 2017 amaieran lanketa hori gorpuzteko. Bertan, garapen ekonomikoko eta kultur arloko udal-ordezkariez gain, Tolomendi Landa Garapen elkartea, Tolosaldea Lanbide Heziketa Institutua eta Tolosaldea Garatzen Garapen Agentzia ere barne dira.

Jada pasaden 2017ko azaroan, Titirijai txotxongilo jaialdia aitzakia, Charlevilleko udal ordezkariak bertaratu ziren Tolosara, eta 2018ko maiatzean, senidetze hitzarmenaren oinarri izango diren alorrak ezagutzeko, ordezkari tolosarrak igo ziren Frantziara. Bertan kultur arloko guneak, herria bera, eta bertako ehun ekonomikoa ezagutzeko beta izan zuten.

Behin azaroaren 17an hitzarmena sinatuta, interesgune diren alorretako plangintzak jarriko dira abian, bi herrien ezagutza, harremanak eta aukerak elkarbanatzeko.