Energia Jarduketen Plan Orokorrari ekarpenak egiteko saioa egingo da asteartean

• Udaletxeko osoko bilkuren aretoan izango da saioa, irailaren 29an, 17:00etan.
• Energia-eraginkortasuna eta iturri berriztagarriak bultzatzeko beharrezkoak diren neurriak ezarriko ditu planak, baita berotegi-efektuko gasen emisioak murriztekoak ere, betiere udal eskumenekoak diren eraikinei eta ekintzei dagokienez.

Tolosako Udala lanean ari da Energia Jarduketen Plan Orokorra lantzeko. Plan hori Tolosako Udalaren plangintza-tresna nagusia izango da energia-trantsizioaren arloan, eta plana ontzeko bidean, herritarrei zuzendutako parte-hartze saioa egingo da, orain arteko lana ezagutarazteko eta ekarpenak jasotzeko. Saioa irailaren 29an izango da, asteartean, udaletxeko osoko bilkuren aretoan, 17:00etatik aurrera.

Energia-eraginkortasuna eta iturri berriztagarriak bultzatzeko beharrezkoak diren neurriak ezarriko ditu Planak, baita berotegi-efektuko gasen emisioak murriztekoak ere, betiere udal eskumenekoak diren eraikinei eta ekintzei dagokienez. Gainera, eraikin nagusien energia-auditoretzak egin ditu udalak. Hartara, Euskal Autonomia Erkidegoko Jasangarritasun Energetikoari buruzko otsailaren 21eko 4/2019 Legea beteko du.

Tolosako Udalaren Energia Jarduketen Plan Orokorraren oinarria azken urteetan izandako energia-kontsumoari buruzko diagnostikoa da. Oinarrizko erreferentzia maila ezartzen du, eta helburuak lortzeko beharrezkoak diren energia-eraginkortasuneko neurriak jasotzen ditu.

Udala Global Factor enpresaren aholkularitza teknikoa jasotzen ari da plana osatzeko.