Zabalik da nerabe eta gazteei zuzendutako ikastaro eta tailerretan izena emateko epea

• Bi ikastaro eta ‘Treba Gazteak’ egitasmoaren barruko lau prestakuntza-saio eskainiko dira, abendura bitarte. 
• Urriaren 13a bitarte izango da izena emateko aukera.

Zabalik da nerabe eta gazteei zuzendutako ikastaro eta tailerretan izena emateko epea. Bi ikastaro eta lau prestakuntza-saio eskainiko dira guztira, abendura bitarte, azken hauek, Gipuzkoako Foru Aldundiarekin elkarlanean, ‘Treba Gazteak’ egitasmoaren barruan.

• Bitxigintza
  Elementu ezberdinak erabiliz, bitxi eta osagarriak egiten ikasteko tailerra.
  Urriaren 21etik abenduaren 9ra, asteartetan.
  18:30-20:30, Kultur Etxean. 20 euro.
• Joskintza eta patroigintza
  Jantziak josten ez ezik, sortzeko patroiak egiten ere erakutsiko da ikastaroan. Urriaren 23tik abenduaren 11ra, ostegunetan.
  17:30-19:30, Kultur Etxean. 20 euro.
• Sexualitatea: oinarrizko ikastaroa
  Azaroak 8, larunbata. 11:00-13:00. Kultur etxea.
  Sexualitatea tabu eta aurreiritzirik gabeko esperientzia integral gisa aztertzeko esparru kritiko eta seguru bat sortzea da helburu nagusia. Taldearen sinismenak eta erabilerak identifikatzea.
• Sexualitatea: arauaz harago
  Abenduak 13, larunbata. 11:00-13:00. Kultur Etxea.
  Helburuak dira nagusi den sexu-ereduaren berrikuspen kritikoa egitea, harreman sexualak, maitasuna eta erotismoa baldintzatzen duten gizarte-egiturei buruz hausnartzea, gure erotika lantzeko beharrezkoak diren gakoak partekatzea eta aztertzea, autonomia eta erabakiak hartzea sexualitatean.
• Begirada kritikoa: gorrotoa al dago munduan?
  Urriak 24, ostirala. 17:30-19:30, Kultur Etxea.
  Helburua da espazio seguru bat eratzea gorroto-diskurtsoen, diskurtso diskriminatzaileen eta ukatzaileen inguruan eraikitako ikaskuntzak lantzeko, eta pentsamendu kritikoa eta narratiba alternatiboak kolektiboki eraikitzeko.
• Begirada kritikoa: scape box, ez ukatu
  Azaroak 14, ostirala. 17:30-19:30, Kultur Etxea.
  Gorroto-diskurtsoetan sakontzea eta horiei aurre egiteko ekintza sustatzea da xedea, enpatiaren eta pentsamendu kritikoaren bidez, diskriminazioaren alternatiba gisa. Scape Box – No lo Niegues jokoaren bidez, taldeetan lan egitea narratiba berriak eraikitzeko eta ikertzeko, desinformazioari eta gorroto-diskurtsoei aurre egiteko.

Bi ikastaroak 16-35 urte bitarteko gazteei zuzendutakoak dira; prestakuntza-saioen kasuan, berriz, bi adin tarte bereiztu dira. Sexualitatearen inguruko saioak 17-24 urte arteko gazteei zuzendutakoak izango dira; begirada kritikoarenak, aldiz, 11-16 urtekoentzat.

Izen-ematea

Urriaren 13a arte (23:59) izango da zabalik jarduera hauetan izena emateko epea. Bi modutara eman ahal izango da izena: online, dagokion galdetegia beteta; eta presentzialki, Kultur Etxeko harreran, arratsaldez.

‘Treba Gazteak’ egitasmoaren barruko lau prestakuntza-saioak doakoak dira, nahiz eta beharrezkoa izango den aurrez izena ematea. Bi ikastaroen salneurria, berriz, 20 eurokoa da, eta ikastaroa hasi baino lehen egin beharko da ordainketa izen-ematea formalizatzeko. Kultur Etxeko harrera bulegoan egin ahal izango da ordainketa, arratsaldetan.