Ligatze Jatorraren Dekalogoa osatuko du udalak herriko gazteen parte hartzearekin

• Aisialdi eremuetan eta ikastokietan egunerokotasunean naturaltzat hartzen diren jokabideak, espektatibak eta jarrerak aztertuko dituzte.

• Sexuen arteko bereizketari aurre egitea, estereotipatutako rolen banaketa zurruna eta hierarkizatua ekiditea eta parekidetasunean, autonomia pertsonalean, errespetuan eta bakean oinarritutako hartu-emanak eraikitzea da helburua.

Jendartean ematen diren sexuen arteko botere harreman hierarkizatuak aisialdi eremuetan ere ematen direnez, Tolosako Udaleko Gazteria sailak Ligatze Jatorraren Dekalogoa osatuko du herriko gazteen parte hartzearekin. Aisialdi eremuetan eta ikastokietan egunerokotasunean naturaltzat hartzen diren jokabideak, espektatibak eta jarrerak aztertuko dituzte, sexuen arteko bereizketari aurre egiteko, eta estereotipatutako rolen banaketa zurruna eta hierarkizatua ekiditeko. Parekidetasunean, autonomia pertsonalean, errespetuan eta bakean oinarritutako hartu-emanak eraikitzea eta sustatzea da proiektuaren helburua, balio pertsonal eta kolektiboak eraikitzeko.

Arremanitz elkartearekin lankidetzan eta To! Mugimendu Erotikoa proiektuaren barruan, gaitze prozesuak eta babestutako esperimentaziorako praktika kolektiboak jarri ditu martxan udalak Ligatze Jatorraren Dekalogoa osatzeko. Gazte lokaletan biltzen diren herriko gazteekin bilerak, dinamikak eta lanketa prozesuak egiten ari dira plataforma digitalen bidez.

Pertsonen arteko harremanetan maitasunak, erotismoak eta sedukzioak lekua hartzen duenean, sexuen arteko zein pertsonen arteko desorekak areagotu egiten dira. Hala, Tratu Onen Mugimendu Erotikoa proiektuarekin, harreman erotikoen inguruan tratu onak sustatzeko jarri da martxan proiektua. Intimitatea eta konfiantzazko harremanak lehen mailan kokatzeko aurrera-pausoak ematea lortu nahi da.