- Irisgarritasun arazoei konponbidea eman eta aldi berean, mugikortasuna hobetuko da; kalearen izaera komertziala indartu eta azpiegitura, akaberak eta argiztapena berrituko dira.
- 6 hilabete iraungo dute lanek eta 5 fasetan bananduta gauzatuko dira.
- Proiektuak 647.663 euroko aurrekontua du (BEZ barne) eta Tolosako Udala, Tolargi eta Gipuzkoako Urak-en artean finantzatuko da.
Gudari kalearen txanda da. Astelehen honetan, ekainak 18, hasiko dira eraberritze lanak. Hala adierazi zieten udal ordezkariek kaleko bizilagun eta merkatariei atzo, ekainak 14, gauzatutako azken bileran. Merkatari zein bizilagunekin hainbatetan batu eta behin beraien nahi eta proposamenak entzun ostean garatu da behin betiko proiektua. Guztira, 647.663 euroko (BEZ barne) inbertsioa gauzatuko da bertan, kale erakargarri, irisgarri, jasangarriagoa eta atseginagoa bilakatzeko Gudari.
6 hilabete iraungo dute lanek eta 5 fasetan bananduta gauzatuko dira, etxadien arabera hain zuzen. Honakoak izango dira:
- 1. fasea: Gudari Kalea eta Foruen etorbide arteko bidegurutzean. 3 astez jardungo da bertan (ekaineko 2 eta uztaileko 1).
- 2. fasea: Foruen etorbidea eta Samaniego kalearen arteko zatia. 13 astez jardungo da bertan (uztaileko 4, abuztuko 5 eta iraileko 4).
- 3. fasea: Samaniego kalea eta Oria kale arteko zatia. 9 astez jardungo da bertan (iraileko 3, urriko 5 eta azaroko 1).
- 4. fasea: Lizardi Poeta plazaren pareko gunea. 4 astez jardungo da bertan (azaroko 2 eta abenduko beste 2).
- 5. fasea: Zumalakarregi eta Laskorain kaleen artean. 3 astez jardungo da bertan (azaroko 1 eta abenduko 2).
- Asfaltatze lanak bitan zatituta burutuko dira:
- Oria kalea eta Foruen etorbide arteko zatia azaroan.
- Foruen etorbidea eta Zumalakarregi arteko zatia abenduan.
Eraberritzea diseinatzeko, kaleko egungo egoeraren azterketa zehatza gauzatu da, bere ingurua, ondoko kaleekin duen harremana, zirkulazio noranzkoak eta eremuak dituen premiak proiektuaren oinarrian ezarriz. Funtsean, espaloi berriak eraikiko dira, egungo zabalerak bere horretan gordeta kalearen gehientsuenean, eta beste kaleekin elkartzen den gune guztietan 'belarri' moduko batzuk ere, espaloia zabalduz; saneamendu sarearen hodiak berriztatuko dira, eta gainera, sare berezi bat sortu; argiztapena berrituko da, eta telekomunikazio sarea amaitu. Horrez gain, altzariak jarriko dira (TAO makina, postontzia, eserlekuak...) eta baita kalea apaintzeko landare apaingarriz osatutako estruktura ugari ere.
Asmoa da ere, kalearen izaera komertziala sustatzea. Errementari kalean ezarri den Gune Biziak programa Gudari kalera egokituko da horretarako. Tolosa erakargarri izaten jarrai dezan bermatzeko.
Funtsean, irisgarritasun arazoei konponbidea eman eta aldi berean, mugikortasuna hobetuko da; kalearen izaera komertziala indartuko da; eta azpiegitura, akaberak eta argiztapena berrituko dira.
Tolosako Udala lanean ari da jada Nafarroa etorbidearen eta Gudari kalearen ondotik honako birgaitzeko proiektuetan: Batxiler Zaldibia, Pedro de Tolosa, Kale Nagusia Korreo eta Enperadore kalearekin lotzen duten pasadizoak edota Gernikako Arbolaren eraberritzearen II. Fasea, kasu.
Birmoldaketaren xehetasunak
Eremu horren berrurbanizazioaren oinarrian galtzada eta espaloien zabalera bere horretan mantenduko dira. Espaloiko zoladuaren akabera ordezkatuko da, azpiegiturak hobetu eta irisgarritasuna bermatzeko lanak egingo dira.
Beste kaleekin elkartzen den gune guztietan, espaloiak handiagotuko dira, hala nola, Oria kaleko, Samaniego kaleko, Foruen kaleko eta Laskorain kaleko bidegurutzeetan.
Foruen kaleko bidegurutzearen ondoren, bi zirkulazio-noranzko izatea proiektatzen da Laskorain kalearekin gurutzatzen den gunera iritsi arte. Errepide tarte horretan, bertan dauden aparkalekuen ilarak kenduko dira eta hegoko espaloia zabalduko da, zabor-edukiontziak ezarri ahal izateko. Laskorain kaleko gurutzagunea gainditu ondoren, galtzadan errei bakarra egongo da eta hegoaldean aparkalekuen ilara bat ezarriko da.
Espaloiak 2,45 m zabal izango dira. Zuhaitz-txorkoak bertatik kenduko dira espaloien ebakidura handiagotzeko. Espaloietan 'Tolosa' moduko baldosa hidraulikoa duen zoladura berria ipiniko da.
Hiriko altzariei dagokionez, eremu horretan dauden hainbat elementu gordeko dira edo lekuz aldatu beharko dira hala nola, postontziak eta TAO txartela ateratzeko makinak.
Halaber, beste elementu berri batzuk ere ezarriko dira, arbolen ordez, lore-askak adibidez, kalean ibiltzea atsegina izan dadin. Era berean bizikletak aparkatzeko bizikleta-euskarriak dituzten bi gune jarriko dira, izan ere kale hau 30 eremuan baitago. Elementu horiek guztiak bidegurutzeetako belarri-formako irtenguneetan kokatuko dira, bertan toki gehiago dagoelako.
Instalazioei dagokionez, kaleko argiteria berriztatuko da, led sistemaduna ezarriz 4 m-ko altuerako zutabeetan. Bestalde, sare elektrikoaren hoditeria berrituko da. Uren alorrean, ur-hornidura sarea duela gutxi berritu zen, eta bere horretan mantenduko da. Baina saneamendu berria egingo da, uren sare bereizia gehituz eta hondakin uren sarea berriztatuz.
