Izaskungo aldapako errepidea norabide bakarreko bihurtuko da, oinezko bidea egiteko

• Goranzko norabidea izango du aldapak, Asuncion klinikako biribilgunera arte.
• Margoketa lanak bakarrik egingo dira, oinezkoen bidea sortu ahal izateko; aldaketarekin 40 aparkaleku inguru ere sortuko dira.

Santa Klaratik Asuncion klinikara doan errepidea norabide bakarreko bihurtuko da irailetik aurrera. Aurrerantzean goranzko norabidea izango du soilik, klinikaren sarrerako biribilgunera arte. Hortik aurrera, Santa Lutziatik barrena jaitsi beharko da.

Aldaketaren helburu nagusia da oinezkoentzako segurtasuna bermatzeko bide bat egitea. Dozenaka dira bide horretan gora-beheran dabiltzan pertsonak, dela klinikara joateko, dela Izaskun edo Uzturrera igotzeko... Guztientzat segurtasuna bermatzea da helburua, orain arte errepidetik bertatik egin behar baitute joan-etorri hori. Neurriak herritarren eskaera historiko bati erantzuten dio, espaloirik gabeko errepide estua baita. 2019an onartutako Mugikortasun Planean ere jasota dagoen aldaketa da.

Hori egiteko interbentzio taktikoa egingo da. Hau da, margoketa lanak bakarrik egingo dira, obrarik egin behar izan gabe, baita bereizgailuak jarri ere. Horrek ahalbidetuko du aldaketa ebaluatu ahal izatea behin betikotasuna eman aurretik. Udal teknikarien azterketaren arabera, espaloi konbentzional bat eginez gero, galtzadaren zabalera gehiegi murriztuko litzateke, ibilgailuen trafikoaren segurtasuna arriskuan jarriz. Hori dela eta soluzio taktikoa hobetsi da, espazioa berrantolatuz, eta norabide bakarreko bihurtuz.

Gainerako espazioa aparkaleku gehiago sortzeko aprobetxatuko da. Guztira 40 plaza baino gehiago sortuko dira, Alde Zaharretik eta klinikatik gertu. Autobideko zubira arte egingo diren aparkalekuak gorriak izango dira, hau da, 1 guneko TAO txartela duten bertakoentzat; autobideko zubitik klinikara sortuko direnak, berriz, txuriak izango dira, eta ez da ordaindu beharko bertan aparkatzeko.

Hasiera batean asteazkenean, irailaren 3an, egitekoak ziren margoketa lanak, baina eguraldia dela eta, baliteke egun batzuk atzeratu behar izatea, eguraldi lehorra behar baita egin ahal izateko. Behin betiko data zehaztutakoan berriro ere komunikatuko da. Pintaketa lanak egiten diren egun berean sartuko da indarrean aldaketa.