Udalak Tolosako enpresen lehiakortasuna sustatzeko diru-laguntzaren deialdia zabaldu du, bigarrenez

Tolosako Udala
2019/05/29 | Ekonomiaren sustapena
  • Ekainaren 30a bitarte aurkeztu daitezke proposamenak Tolosako Udaleko erregistro elektronikoan. Zientzia eta teknologien alorreko 50 langiletik beherako enpresei dago zuzendua.
  • Olatz Peon Ormazabal, alkatea: “beharrezkoa da berrikuntza sustatzea enpresetan: garapenari heltzea ikerketaren bitartez, I+G-a, soluzio berri bezain eraginkorrei bidea emango dieten proiektuak sortuz”.

Tolosan eta Apatta-Errekako industriagunean kokatuta dauden 50 langilez beherako industria enpresen jarduera sustatuko du Udalak lehiakortasun jarduerak lagunduz. Horretarako Enpresen Lehiakortasunerako diru-laguntzaren Ordenantza sortu zuen iaz, eta aurten bigarren deialdia argitaratu berri du. Ekainaren 30a bitarte aurkeztu daitezke proposamenak. 15.000 euroko kreditua ezarri da. Helburu da bertako enpresen berrikuntza babestu, bultzatu eta indartzea.

Tolosako ekonomiaren motorra da sektore industriala, enplegu sortzaile nagusia. Gehienbat, enpresa txiki eta ertainek osatua: 50 langiletik beherakoak, eta metal-mekanika arloari lotuak, non enpresa handiagoei eskaintzen dieten zerbitzua azpikontratista eran. Premisa horrekin garatu zen iaz diru-laguntza lerro berri hau.

Zientzia eta Teknologien alorrak lehenetsiko dira: biozientzia, osasuna, energia, fabrikazio aurreratua, elikadura, ekosistemak, giza habitata eta industria kultural, sortzaile eta digitalak. Eskatzaile bakoitzari emango zaion diru-laguntzaren gehienezko zenbatekoa ezingo da izan proiektuaren kostuaren %75 baino gehiago, ezta 3.000 eurotik gorakoa ere. Norgehiakoa bidez esleituko dira eta Udaleko Ekonomia Garapenaren saila arduratuko da prozesuaz.

Olatz Peon Ormazabal alkateak adierazi eran, industria-jardueren lehiakortasunari balio erantsi handiko zerbitzu eta produktuekin eutsi ahal izateko, beharrezkoa da berrikuntza sustatzea enpresetan: “garapenari heltzea ikerketaren bitartez, I+G-a, soluzio berri bezain eraginkorrei bidea emango dieten proiektuak sortuz. Bide horretan garrantzitsu zaigu hezkuntza, Lanbide Heziketak dakarren ezinbesteko jakintza eta gaitasuna, etorkizuneko langile kualifikatuen prestakuntza”. Nabarmendu du, Industriaren gaineko eskumena Eusko Jaurlaritzarena izanagatik ere, Udalak eman dituela enpresa hauei begirako pausu ugari, tartean, Emari coworking espazioaren sustapena, Bertako Enpresen I. Eguna, EKIN Ekintzailetza jardunaldia... eta ale berri bat dela hau Udal Gobernuak garapen ekonomikoarekiko duen apustu irmoan.

Eskabidearen eta dokumentazio osagarriaren aurkezpena telematikoki Tolosako Udaleko erregistro elektronikoan egin behar da.

Deialdia www.tolosa.eus -en kontsulta daiteke. Atxikita.