Azaroaren 8an amaituko da Euskal Herria plazako gazteentzako etxebizitzetan izena emateko epea

• Deialdia 18 eta 35 urte bitarteko gazteei zuzenduta dago eta gehienez ere 3 urterako esleituko dira apartamentuak.

Tolosako Udalak Euskal Herria plazako etxebizitza dotazionalen esleipenerako deialdi berria ireki du, udalerriko gazteei zuzenduta. Prozesu honen helburua da esleipen-zerrenda eta itxaron-zerrenda bat osatzea, etxebizitza hutsak betetzeko.

Parte hartzeko baldintzak:
Deialdian parte hartzeko, eskatzaileek hainbat baldintza bete behar dituzte, horien artean: 

1. Adina: eskaera aurkezten den urtearen amaieran (abenduak 31) 18 urte beteak izatea edo 35 urte baino gehiago ez izatea. 

2. Elkarbizitza unitatea: gehienez bi kidez osatutako elkarbizitza unitateak. 

3. Tolosarekiko lotura: Eskatzaileek Tolosarekiko bizileku edo lan lotura egiaztatu beharko dute: 

   1. Gutxienez urtebeteko errolda edo Tolosa ohiko bizileku gisa. 

   2. Tolosan 10 urtez erroldatuta bizi izana. 

   3. Tolosarekin lan lotura gutxienez 5 urtez. 

4. Diru-sarrerak: 2023ko Errenta Aitorpenean oinarrituta, eskatzaileen urteko diru-sarrerak 3.000 eta 25.000 euro artekoak izan behar dira.

5. Beste baldintza batzuk: Ezin da Euskal Herriko zazpi lurraldeetan beste etxebizitzarik jabetzan izan. 

Erabilerarako baldintzak:
Etxebizitzak hiru urtez esleituko dira, ahalik eta gazte gehienek sarbidea izan dezaten. Hilabeteko kanonak elkarbizitza unitatearen diru-sarreren arabera zehaztuko dira; logela bateko apartamentuen kasuan, gutzieneko kanona 150 eurokoa izango da eta bi logeletako etxebizitzetarako, 180 eurokoa. Trastelekua erabiltzeko kanona apartamentuko zenbatekoari gehituko zaio. 

Eskaera epea:
Beharrezko dokumentazioa eta inprimakiak udalaren webgunean daude eskuragarri. Behin horiek beteta, interesdunek azaroaren 8a bitarte dute eskaerak aurkezteko UDATEn (Tolosako Udaletxeko Erregistroan) edo telematikoki, udal webguneko egoitza elektronikoan.  

Esleipen prozesua:
Eskaerak jaso ondoren, onartutakoen eta baztertutakoen behin-behineko zerrendak argitaratuko dira, Udalaren iragarki taulan zein webgunean. Onartutako pertsonen zerrendarekin zozketa publikoa egingo da, esleipen-ordena eta itxaron-zerrenda zehazteko.

Ondorengo betebeharrak:
Zozketa egin ondoren, esleipendunek erabilera baimen kontratua sinatu beharko dute eta deialdiaren oinarrietan ezarritako betebehar guztiak bete, etxebizitzaren mantenuari eta diru-sarreren berrikuspenari buruzkoak barne.

Informazio gehiagorako, deialdi honen oinarri osoak udal webgunean, Etxebizitza sailaren atalean kontsulta daitezke.