2018ko errenta aitorpena euskaraz egiteko deia egin du Tolosako Udalak UEMArekin elkarlanean

Tolosako Udala
2019/04/03 | Euskara eta Hezkuntza
  • Errentaren gaineko aitorpena egiterakoan, zergadunek hainbat bide dituzte euskaraz egiteko, eta oso modu errazean gainera: lehen urratsetik zein hizkuntzatan egin nahi duten aukera dezakete.
  • Tolosan, 2017an, 2.578 errenta aitorpen aurkeztu ziren esukaraz eta 7.629 gazteleraz. 2008tik %146 egin du gora euskarazko aitorpenen kopuruan, 1.044tik egungo 2.578etara igaroz.

Tolosako Udalak, Udalerri Euskaldunen Mankomunitatearekin elkarlanean, 2018ko errenta aitorpena euskaraz egiteko kanpaina jarri du abian. Iaz bezala, eta gaur egun herritarren gehiengo handi batek autolikidazio proposamena jasotzen duela kontuan hartuta, berariaz horri eman zaio aurten ere garrantzia.

Ohi bezala, errentaren gaineko aitorpena egiterakoan, zergadunek hainbat bide dituzte euskaraz egiteko, eta oso modu errazean gainera: lehen urratsetik zein hizkuntzatan egin nahi duten aukera dezakete.

Urtez urte, gero eta gehiago dira errenta aitorpena euskaraz egiteko hautua egiten duten herritarrak. Euskararen normalizaziorako bidean udalerri euskaldunak egiten ari diren pausu bat gehiago da errenta aitorpena ahalik eta herritar gehienek euskaraz egitea. Tolosan, 2017an, 2.578 errenta aitorpen aurkeztu ziren esukaraz eta 7.629 gazteleraz. 2008tik %146 egin du gora euskarazko aitorpenen kopuruan, 1.044tik egungo 2.578etara igaroz. Kanpaina honekin, herritarrek administrazioarekin dituzten harremanak euskarazkoak izan daitezen bultzatu nahi da.

Hona hemen kanpainako data nagusiak:

  • Errenta autolikidazio proposamenak 2019/04/08tik 2019/07/01era bitartean onartu ahal izango dira.

  • Gainerako errenta modalitateetan (mekanizatua eta Internet) eta ondarean epea 2019/04/15ean hasi eta 2019/07/01ean amaituko da.

  • Errenta aitorpen mekanizaturako hitzorduak 2019/04/12tik 2019/06/08ra bitartean eskatu ahal izango dira. Autolikidazio proposamena onartu nahi ez dutenek 2019/04/17ra arte itxaron beharko dute hitzordua eskatzeko.

Hiru dira errenta aitorpena aurkezteko modalitateak:

  • Proposamena: 2019/04/03tik 2019/04/17ra bitartean, 200.000tik gora proposamen bidaliko ditugu, apurka-apurka, postaz (aitorpen guztien erdia baino gehiago). Departamentuaren webgunean eta gure bulegoetan ere eskuratu ahal izango dira. Proposamenarekin ados izanez gero, onartu egin behar da telefonoz edo internet bidez. Iaz proposamenen %85,8 onartu ziren.

  • Mekanizatua: telefonoz edo internet bidez hitzordua aurrez eskatuz gero, aitorpena egiten lagunduko dizugu gure bulegoetan.

  • Internet: gure laguntza programaz baliatuta, internet bidez bidali dezakezu aitorpena. Zerorrek egin dezakezu zuzenean, edo, bestela, 500tik gora ordezkari profesionaletako edozeinen bitartez.

Informazio gehiago: www.gipuzkoa.eus/ogasuna atalean.