Tolosako Udalak bat egin du aurten ere Euskararen Nazioarteko Egunarekin

• Mundu mailako krisiari euskaraz aurre egitearen alde agertu da Tolosako Udala, euskararekiko duen konpromisoa berretsiz.

Gaur ospatzen den Euskararen Nazioarteko Egunarekin bat egin du Tolosako Udalak, euskararekiko duen konpromisoa berretsiz. Aurtengoa ez da urte erraza izan inorentzat, pandemiaren eragina munduko txoko guztietan somatu da, eta, noski, baita euskararen hiztun elkartean ere, bereziki erabilera mailan. Horregatik, inoiz baino garrantzitsuagoa da erakunde publikoek euren konpromisoa sendotzea eta gizarteak, bere osotasunean, euskaraz aurre egitea mundu mailako krisi honi.

Hala, Tolosako Udalak euskararen nortasuna indartzen eta balioan jartzen jarraitzen du, eta lanean dihardu gure ama hizkuntzaren erabilera indartzeko urratsak egiten. Norberaren eta gizartearen konpromisoak sendo uztartzen jarraitzeko deia egin du udalak, bide horri jarraituz etorri baitira euskararen aurrerapauso behinenak: unean uneko beharrizanei euskaraz erantzuten, etorkizunerako bidea euskaraz zolatzeko euskal instituzioek, gizarteak eta norbanako bakoitzak.

Tolosako Udalak gogorarazi du Euskaraldia martxan dagoen honetan, aurten berriz ere zailtasunak aukera bilakatzeko abagunea eskaintzen duela euskarak, krisia aukera bihurtzeko lanabesa. Aurtengoan, balio berezi batez apainduko da ahoa bizi, belarria prest eta bihotza kartsu duten euskaltzale guztien ekimena. Aurtengoan, inoiz baino erabakigarriagoa izango da euskararekiko gertutasunezko keinu praktiko oro, euskal hiztunongatik zein euskararen zabalkundean erdaretatik lagundu nahi dutenengandik datorrela ere.

Horregatik guztiagatik, aurten ere Tolosako Udalak bat egin du Euskararen Nazioarteko Egunarekin, krisialditik sendoago ateratzea helburu dugun honetan, euskara aurrera egiteko tresna baliagarria delako.