Udako hilabeteetan haur sahararrak hartzeko harrera-familiak lortzeko deia egin dute

Tolosako Udala
2019/03/15 | Gizarte Zerbitzuak eta Osasuna
  • 'Oporrak Bakean: 2 familia ditut, bata Saharan eta bestea Euskal Herrian' programaren baitan, 20 harrera-familia lortzearen helburua ezarri dute eskualdeko Udalek eta Tolosaldea Sahararekin elkarteak; une honetan 9k eman dute izena. Udalen eta elkartearen bitartez eskura daiteke harrera-familia izatearen informazio gehiago.
  • Eskualdeko azken bilketa-kanpainan jasotakoa Saharara bidean da jada: janaria, osasun-tresnak, jantziak, eskola materiala edota jostailuak, beste hainbaten artean.

Tolosaldeko Udaletxeetako ordezkariek eta Tolosaldea Sahararekin elkarteak bat egin dute, beste behin, Oporrak Bakean 2019ko programa Tolosaldea mailan martxan jartzeko. Aurten, 'Oporrak Bakean: 2 familia ditut, bata Saharan eta bestea Euskal Herrian' lelopean.

10 eta 12 urte bitarteko haur sahararrak bidaiatuko dute Tolosaldera, ekainetik abuztura bitartean. Tolosaldea Sahararekin elkartean adierazi duen eran, oinarrizko beharrei aurre egiteko kanpo laguntza “behar-beharrezkoa” dute.

Saharar errefuxiatu kanpamentuetan jaio eta haztera behartuak izan diren haurrak dira, orain dela 43 urte euren lurraldetik, Mendebaldeko Saharatik, bota baitzituzten. Hain zuzen ere, Tolosan, otsaileko Osoko Bilkuran, Saharar Errepublika Arabiar Demokratikoa aldarri egin zeneko 43. urteurrenean, jasaten duten egoera gaitzetsi eta beren eskubideak errespetatzea eskatzen duen mozioa izan zuen hizpide udalbatzak.

2000tik hona, 19 urte hauetan ehundaka haur eta ehundaka harrera familien parte hartzea izan da Tolosaldean. Bataz beste, gure eskualdean 15 bat harrera familiak ematen dute izena programan urtero. Iaz 19 izan ziren eta zifra hori mantendu nahi da aurten ere. Une honetan 9 harrera familia daude, “hortaz oraindik laguntza behar dugu. Tolosaldeako udaletxeetako ordezkariek eta Tolosaldea Sahararekin elkarteak dei egiten dugu, 20 harrera-familia lortzearen helburua betetzen lagundu diezaguten herritarrek”.

Familia bakoitzaren egoerara eta aukeretara egokitzen da programa, malgutasunez eta Udaletxeek haurren bidaiako gastuei aurre egiten diete. Programa Tolosaldeako Udalek finantziatu eta kudeatzen dute, Tolosaldea Sahararekin elkartearen laguntzarekin.

Informazio gehiago eskuratzeko:

  • Udaletako gizarte zerbitzuetara jo daiteke.

  • Baita Tolosaldea Sahararekin elkartearen bitartez ere.

Janari eta material bilketa, eskualdean

Tolosaldea Sahararekin elkarteak gauzatu duen azken bilketa-kanpainan jasotakoa Saharara bidean da jada: janaria, osasun-tresnak, jantziak, eskola materiala edota jostailuak, beste hainbaten artean. Eskualdeko herritar, udaletxe eta enpresa ugarik babestu dute ekimena.