Tolosak eta Amezketak bost kirolari aitortu dituzte, Munduko Txapelketetan lortutako emaitzengatik

• Joseba Reguillaga eta Joseba Etxarri munduko txapeldun izan ziren 23 urtez azpiko Nage No Kata judo modalitateko txapelketan; Unai Saralegi eta Unai Reguillaga, berriz, txapeldunorde nagusien mailan. 

• Imanol Rojo eskiatzaile tolosarra ere Munduko Txapeldun izan zen, irailean, rollereskiko teknika klasikoko 15 kilometroko maldan gorako proban.

Tolosako eta Amezketako Udalek bost kirolari aitortu dituzte, gaur arratsaldean, nazioarteko lehiaketetan lortutako lorpenengatik: Joseba Reguillaga, Joseba Etxarri, Unai Saralegi eta Unai Reguillaga judokak, eta Imanol Rojo eskiatzailea.

Judo Klub Tolosa taldeko lau judokek emaitza historikoak lortu dituzte azaroan Las Vegasen, Nage No Kata modalitatean. Hain zuzen, Joseba Reguillaga amezketarra eta Joseba Etxarri tolosarra munduko txapeldun izendatu ziren, 23 urtez azpiko mailan; Unai Saralegi tolosarra eta Unai Reguillaga amezketarra, berriz, txapeldunorde izan ziren, elite mailan. Bikote honek Alemaniako Europako Kopan ere beste zilarrezko domina bat lortu zuen.

Imanol Rojo eskiatzaile tolosarrak, berriz, munduko txapeldun izatea lortu zuen irailean Val di Fiemmen (Italia) jokatu zen rollereskiko teknika klasikoko 15 kilometroko maldan gorako proban. 

Andu Martinez de Rituerto eta Mikel Arteaga Tolosako eta Amezketako alkateen eskutik jaso dute bi herrien aitortza, txapela eta garaikurra. Tolosako alkateak nabarmendu duenez, kirolarien «ahalegina, lana eta grina miresteko modukoak» dira: «Eredu zarete herriko gazte eta kirolzaleentzat. Eta zuek egindako ibilbidea gure komunitatearentzat harrotasun iturri da. Zuen arrakastak gure herriak poztu ditu eta zuen esfortzuak fruitua eman duela ospatzen dugu, gaur, denok». Arteagak ere balioa eman dio Amezketako herri txiki batean horrelako maila lortu duten kirolariak izateari.

Ekitaldiaren amaieran, Bixente Gorostidi bertsolariak bertsoak eskaini dizkie kirolariei.