- Gonbidapenen zozketan izena emateko udal webgunean dagoen formularioa bete beharko da; zozketa otsailaren 17an egingo da.
- Sarrerak, berriz, otsailaren 18an, asteartea, jarriko dira salgai, 16:00etatik aurrera, www.bibe.me plataforman.
Inauterietan zezen-plazara sartzeko sarrerak otsailaren 18an jarriko dira salgai, 16:00etatik aurrera. Sarrera gehienak internet bidez salduko dira, www.bibe.me atarian. Azken urteetan egin bezala, egun bakoitzeko sarrera batzuk zezen plazako leihatilan jarriko dira eskuragarri.
Iazko balorazio eta inkestetan egindako eskariei erantzunez, kopuru handiagoa bideratuko da leihatilara (orain arte, eguneko sarreren % 5). Leihatilaren ordutegia, baina, aldatu egingo da, eta eguerdira arte itxaron beharrean, 10:30ean zabalduko da, sarrerak agortu arte.
Pertsona bakoitzak gehienez bost sarrera erosi ahal izango ditu egun bakoitzeko. Ostegun Gizen, Zaldunita, Astelenita eta Asteartita eguneko ekitaldien kasuan, harmailetako sarreren salneurria 3 eurokoa (+ komisioa) da; Ostiral Mehe egunerako, berriz, nahiz eta doakoak izan, sarrerak internet bidez hartu beharko dira, gainerakoekin egiten den moduan. Palkoak osorik erosi beharko dira (17 lagun), 65 euroko prezioan (+ komisioa). Erosleei, argibideak bidaliko zaizkie, palkoetako sarrera horiek non, noiz eta nola jaso ditzaketen jakiteko, eta erosketa egiterakoan jasoko duten agiria aurkeztu beharko dute sarrerak jasotzeko.
Aurten egun bakoitzeko ikuskizunetarako palkoetako baten sarrerak zozketa bidez esleituko dira, Tolosa&Co merkatarien elkartearekin elkarlanean, herriko saltokietan erosten dutenen artean. Otsailaren 10etik 16ra bitarte elkarteko bazkide diren saltokietan 15 eurotik gorako erosketa bat egiten duten guztiek txartel bana jasoko dute. Zozketa hilaren 17an egingo da: lau zenbaki aterako dira, eta zenbaki bakoitzak lau sarrera jasoko ditu palkorako. Udalaren eta Tolosa&Co-ren sareetan emango dira ezagutzera saridunak.
Otsailaren 18an 16:00etan aktibatuko da sarreren erosketa eta, ikuskizunetako sarreren salmenta plataforma gehienek funtzionatzen duten bezala, itxaron gela birtuala izango da. Erabiltzaileak webgunera iritsi diren ordenaren arabera antolatuko ditu, eta sarbidea emango diete txanda egokitutakoan. Ordua baino lehen sartzen denari, berriz, atzera-kontu bat agertuko zaio, baina horrek ez du esan nahi itxarongela birtualean dagoenik, 16:00etan sartu beharko da. Behin erosketa burututa, eta ordainketa ondo egin dela konprobatuta, posta elektronikoan jasoko dira sarrerak.
Gonbidapenak txarangekin saltoka sartzeko
Iaz bezala, txarangen atzetik saltoka sartu eta plazari buelta eman ahal izateko gonbidapen sistema izango da. Egun bakoitzeko 300 banatuko dira eta zozketa bidez esleituko dira.
Izen-ematea astelehenean zabalduko da, 12:00etan, udalaren webgunean, eta otsailaren 14ko 12:00ak arte (ostirala) izango da. Egun bakoitzeko eman ahal izango da izena. Kuadrilla, familia eta konpartsen presentzia bermatu nahian, izen-emate bakoitzeko 10 gonbidapen eskatu ahal izango dira. Adinez nagusi izan beharko da zozketan izena emateko, eta adin txikikorik balego, adinez nagusi den norbaitekin sartu ahal izango dute.
Otsailaren 17an, sarreren salmenta aktibatu baino egun bat lehenago, egingo da zozketa. Emaitza zehaztutako posta elektronikoaren bidez jakinaraziko da. Gonbidapena egokitzen zaien herritarrei, jasotzera joandakoan emango zaizkie sarbiderako jarraibideak.
Gonbidapen mota hau duten herritarrek, txarangekin batera sartu ahal izango dute plazara, baina saltoka buelta eman ondoren, atera egin beharko dute, ezingo dute barruan geratu. Hori errespetatzea eskatzen du udalak, ikuskizuna bertan behera uzteko arriskuan egon ez dadin. Gonbidapenik gabe, ezingo da txarangarekin sartu.
Txarangen atzetik sartzeko gonbidapena egokitu edo erositako sarrera eskuratu, baina gero aprobetxatuko ez denik balego, beste edonori uzteko dei egiten du udalak, ahalik eta herritar gehien izan daitezen aukera hori izango dutenak.
Zezenetan parte hartu nahi dutenentzako ate-irekiera
Plazako hondargunean zezenen aurrean egon nahi dutenek ordutegi zehatza izango dute sarbiderako: gehienez, eta aforoaren neurriak kontuan hartuta, 300 pertsona.
Ostegun Gizenean, Ostiral Mehean eta Asteartitan, 15:30etik 16:00etara zabalduko dira ateak, Zalditegiaren aldetik. Igandean eta astelehenean, berriz, 15:00etatik 15:30era, jende gehiago izaten baita egun horietan. Banan-banan egingo da sarrera eta behin kopurua gaindituta, ez zaio beste inori sartzen utziko. Neurri honen helburua da txarangak iristen direnerako pilaketak ekiditea, edo murriztea behinik behin, ordutik aurrera soilik musikariek edota atzetik saltoka sartzeko gonbidapena dutenek soilik sartu ahal izango dutelako. Ez da aterik zabalduko muga gaindituta.
16 urtetik gorakoek bakarrik izango dute hondargunera sartzeko aukera, hala jasotzen baitu Joko eta Ikuskizunen Legeak. Ateak irekitakoan, Udaltzaingoak NANak egiaztatuko ditu, hortaz, agiriak eskura izatea eskatzen zaie bertaratzen direnei. Alkoholaren edo bestelako sustantzien eraginpean daudenei, berriz, ez zaie sarbiderako baimenik emango.
Segurtasun perimetroa, zezen plazaren kanpoaldean
Udaltzaingoak berriro ere zezen-plaza kanpoaldeko segurtasun perimetroa indartuko du Inauterietan, kanpoaldean sortzen diren pilaketak ekiditeko. Oria kaleak eta Gudari kaleak bat egiten duten puntuan itxiko da sarbidea, eta soilik txarangek, gonbidapena dutenek edo harmailaren zati horietan sarrera dutenek pasa ahal izango dute. Zalditegiaren eremua ere itxi egingo da, eta hondargunera sartu nahi dutenek bertatik sartu beharko dute.
Zergatik neurri hauek?
Joko eta Ikuskizunetarako aforoaren inguruko araudi eta legeak zurrunagoak dira orain, eta udala horiek betetzera behartuta dago. Ezin da nahi adina jende sartu, ez zezen-plazan, ez eta bestelako azpiegituretan ere (Leidor, Beotibar…). 2.973 dira, zezen-plazako harmailen kasuan.
Inauterien kasuan, egunero Eusko Jaurlaritzako Joko eta Ikuskizunetako ikuskari bat egoten da zezen-plazan, eta aforoa betetzen ez dela ondorioztatuz gero, erabaki lezake bertan behera uztea. Txarangen atzetik saltoka sarbide librea utziz gero, gertatu izan da batzuk harmailetara salto egitea, eta jada legeak jarritako irizpideak ez lirateke beteko, eta bertan behera uzteko arriskua egon liteke. Gonbidapen sistema, herriko ohiturak ahal bezain beste mantendu ahal izateko sortu zen, oreka topatu nahian.
