Landa auzoetako Kultura Plazarako emanaldietara joateko doako autobus zerbitzuan izena emateko azken egunak

• Abuztuaren 31n Aldabara, irailaren 5ean Bedaiora eta irailaren 6an Urkizura joan-etorria egiteko doako zerbitzua eskainiko da Tolosako erdigunetik.
• Doako zerbitzua izan arren, aurrez erreserba egin beharko da, ostirala, abuztuaren 29a baino lehen, kultura@tolosa.eus helbidera idatzita.

Kultura Plazara udako kultur eskaintza azken txanpan sartuko da. Ostiralean, hilaren 29an, Suite Seda taldearen emanaldia izango da San Frantzisko pasealekuan, 19:30etik aurrera.  Talde donostiarrak funk, soul eta disko musika doinuak eskainiko ditu.

Igandean, abuztuaren 31n, Aldaban izango da ikuskizuna. Hutsun & Ortzi konpainiak ‘Urbasa’ akrobazia-ikuskizuna eskainiko du, 18:00etatik aurrera. Tolosako hirigunetik Aldabara joateko doako autobus zerbitzua izango da. 17:00etan aterako da San Frantzisko elizaren pareko geltokitik, eta ikuskizuna amaitu ondoren izango da itzulera. 

Abuztuaren 29a, ostirala, baino lehen eman beharko da izena kultura@tolosa.eus helbidera idatzita. Erreserba egiterako orduan izen-abizenak, leku kopurua eta harremanetarako telefonoa zehaztu beharko dira.

Iraileko lehen astean ere hiru emanaldi izango dira. Lehena, hilaren 4an, osteguna: Trapu Zaharra antzerki konpainiak ‘Azkena eta bagoaz!’ antzezlana eskainiko du Berazubi auzoan. 19:00etan izango da emanaldia.

Irailaren 5ean, Esti Markezen kontzertua izango da Bedaion, 19:00etan. Hurrengo egunean, berriz, hilaren 6an, Oreka TX eta Thierry Biscary abeslariak izango dira Urkizun, 18:00etan, egurrezko eta harrizko txalapartak ahotsarekin eta perkusioarekin nahastuz.

Azken bi emanaldi hauetarako autobus zerbitzua ere eskainiko da. Emanaldiak hasi baino ordubete lehenago irtengo da San Frantziskotik —irailaren 5ean 18:00etan eta irailaren 6an 17:00etan—. Kasu hauetan, lekuaren erreserba ere abuztuaren 29a baino lehen egin beharko da, kultura@tolosa.eus helbidera idatzita.

Kultura Plazara asteburu osoko jaialdiarekin amaituko da. Irailaren 12tik 14ra Zumardiaundia hartuko du musikak. Lehen egunean, Node dantza konpainia (19:30), Rüdiger (20:00), eta Izaki Gardenak (22:00) izango dira; hilaren 13an, berriz, Bea Asurmendi (20:00) eta Sukena (22:00). Igandean, Tolosaldeko sortzaileen azokak emango dio amaiera egitasmoari.