Emakumeen kontrako indarkeria salatzeko flashmob-a egingo da aurten ere

• Azaroaren 23an izango da eta dagoeneko abestia aukeratu eta koreografia egin da. Youtuben eta Tolosako Udalaren sare sozialetan ikusi daiteke bideoa.

Tolosako Udaleko Gazteria eta Berdintasun sailek bultzatuta, eta Udaberri dantza taldearen, Usabal kiroldegiaren eta Kultur Etxearen, Alur dantza taldearen eta herriko ikastetxeen laguntzarekin, emakumeen kontrako indarkeria salatzeko flashmob-a egingo da aurten ere. Emakumeenganako Indarkeriaren Nazioarteko Egunaren harira antolatu den ekintza da, eta azaroaren 23an egingo da, larunbata, 12:00etan, Trianguloan.

Ekintza honen helburua emakumeenganako indarkeriaren kontrako aldarrikapen masiboa egitea da, eta haurrek eta gazteek gai honen inguruan kontzientzia hartzea.

Aurtengo abestia aukeratu da jada eta koreografia ere sortu da, eta youtuben eta Tolosako Udalaren sare sozialetan daude eskuragarri, flashmob-ean parte hartu nahi duten guztiek koreografia ikasi dezaten.

Modus Operandi taldearen “Ezetz da ezetz” abestia aukeratu da flashmob-erako eta koreografia Mila Garcia de Iturrospek eta kiroldegiko lantaldeak egin dute.

Azaroaren 23an soinean zerbait txuria edo morea eramateko eskatzen da. Txuriz jantzita doazen pertsonei puntu moreak emango zaizkie.

Honako esteka honetan ikusi daiteke bideoa: https://youtu.be/xS0chc3O9Rc