Tolosandblues jaialdiak 3000 pertsona inguru erakarri ditu

• Segurtasun neurriak bermatu dira uneoro kontzertuetan, eta antolatzaileek egin duten balorazioa “oso positiboa” izan da.

• Zazpi talde euskaldun aritu dira oholtza gainean, eta jaialdia hasi baino bi aste lehenago sarrera guztiak agortuta zeuden.

Uztailaren 1ean hasita 4ra bitarte blues doinuek jantzi dituzte Tolosako plazak. Tolosatik mugitu gabe kulturaz gozatu daitekeela erakutsi du TolosandBlues jaialdiak beste behin eta antolatzaileek oso balorazio positiboa egin dute. Blues barruan egon daitezkeen korronte desberdinak entzun ahal izan dira, oso formatu desberdinetan. Swing, boogie, rhythm&blues, rockabilly, soul, blues-rock eta blues hutsean murgildu dira tolosarrak egun hauetan.

Egoerak eskatzen dituen prebentzio eta segurtasun neurriak hartuta egin dira kontzertu guztiak eta guztira 3000 pertsona inguru bertaratu dira ikustera eta Tolosan musikaz gozatzera. Euskal Herriko zazpi taldek osatzen zuten aurtengo kartela eta, jaialdia hasi baino bi aste lehenago, sarrera guztiak agortuta zeuden. Antolatzaileek adierazi dutenez, urtez-urte oihartzun handiagoa du jaialdiak, eta tolosarrak ez ezik, inguruko herrietako publikoa ere bertaratzen da.

Segurtasun neurri zorrotzak

Formatu txikiko kontzertuak izan dira, aurrez eskuratutako gonbidapen bitartez gozatu ahal izan direnak, edukierak kontrolatzeko. Musukoaren erabilera eta segurtasun distantzia mantentzea derrigorrezkoa izan da ikusleen artean.