Tolosa Donostiako autobus turistikoan

• Tolosako azoka du irudi eta 'Tolosa, the origins of our gastronomy. Zatoz jatorrira' leloa. Hilabetez egongo da Gipuzkoako hiriburuan zehar, urriaren 14a bitarte.
• Autobusean iragarkia jartzeaz gain, ostiralero pertsona bat egongo da Tolosaren flyer turistikoak banatzen.
• Nerea Letamendia, Merkataritza, Feriak eta Turismo zinegotzia:“hiri-markaren posizionamendua indartu eta herriaren kanpo proiekzioa dugu helburu. Funtsean, era jasangarrian, Donostiara datozen bisitariei Tolosa ezagutarazi eta gurera erakartzea”.

Tolosa eta bertako gastronomia promozionatzea helburu, pasa den irailaren 17tik Donostiako kaleetan barrena Tolosako publizitatea dabil. Hain zuzen, Udaleko Merkataritza, Feriak eta Turismo departamentuak Gipuzkoako hiriburuko autobus turistikoaren atzekaldean Tolosari buruzko publizitatea ezarri du. Tolosako azoka du irudi, 'Tolosa, the origins of our gastronomy. Zatoz jatorrira' leloa eta Donostiarekiko duen gertutasuna, 20 minutu, nabarmendua. Hilabetez egongo da Donostian zehar, urriaren 14a bitarte.

Autobusean iragarkia jartzeaz gain, ostiralero (guztira 4 ostiraletan) pertsona bat egongo da autobusak dituen geltokietan zehar Tolosaren flyer turistikoak banatzen. Bertan, autobusean bezalaxe, Tolosa den helmuga gastronomikoa nabarmentzen da, udazkeneko agendari buruzko informazioa emateaz gainera. Atxikita*

Nerea Letamendia, Merkataritza, Feriak eta Turismo zinegotziak nabarmendu du hiri-markaren posizionamendua indartzearen garrantzia: “turismoa aukera da Tolosarentzat. Donostiatik oso hurbil gaude eta hemen gure nortasuna erdigune den esperientziazko turismoa dugu. Ikusirik Donostia dela gure lurraldearen erakarpen nagusienetako bat, bertara etortzen direla bisitariak, eta bertan Tolosak, duen kokaleku, gertutasun eta baliabideengatik, dituen aukerak, gure herria promozionatu eta jendea erakartzeko ekimena da autobusarena. Jada Hiri Ekonomiaren Plangintza Estrategikoan lan ildo dugu 'Herriaren Kanpo Proiekzioa', eta bide horretan ari gara lanean”.