Aurrekontu partehartzaileen prozesua abiatu du Udalak

Tolosako Udala
2021/06/18 | Tolosatzen
  • Herritarrekin datorren urteko aurrekontuak lantzen hasteko lehen saioa, ekainaren 22an egingo da, online, arratsaldeko 18:00etatik 19:30era. Parte hartzeko aurrez izena ematea beharrezkoa da.

  • 2022an indarrak non jarri zehaztu du dagoeneko gobernuak: herritarren ongizatea eta gizarte kohesioa; Tolosa biziberritzea, herri bizia helburu; pertsonak erdigunean kokatzen dituen Tolosa atseginagoa eta zainduagoa; ingurumaren zaintza eta jasangarritasuna, Aldaketa Klimatikoari aurre egiteko eta garai berrietara egokitutako udala.

  • Joseba Ormazabal, Gobernantza eta Komunitateko zinegotzia: “Zehaztu ditugun indar-foko eta lehentasunak herritarrekin partekatu nahi ditugu, elkarlanean politika publikoak, aurrekontuak eta gure herriaren etorkizuna lantzen eta eraikitzen jarraitzeko”

 

Egiteko modu berrietan sakonduz jarraitzen du Tolosako Udalak eta legealdi hasieran iragarri modura, aurrekontu parte hartzaileen prozesua urte osora zabaldu da. Prozesuari hasiera emateko, lehen saioa egingo da ekainean herritarrekin.

Lehenik eta behin, indarrak non jarri

Joseba Ormazabal, Gobernantza eta Komunitatea saileko zinegotzi arduradunak adierazi duenez, TOLOSATZEN prozesuaren baitan, azken urteotan urrats garrantzitsuak egin eta egitasmo berriak abiarazi dira Gobernantza eredu berrietan sakontzeko. Aurrekontu parte hartzaileen prozesuari dagokionez, udalaren eta herritarren arteko elkarrizketa urteko momentu jakin batera mugatu ordez, urte osora zabaldu da, prozesua berregokituz. Eta beraz, udalean hasita daude datorren urteko aurrekontuak lantzen.

“Orain arte, aurrekontuak lantzeko garaian, unean uneko erronkak edo beharrak izan ditugu kontuan eta egitasmo zehatzen inguruan jardun dugu; iazko prozesua ere testuinguruagatik, berezia izan zen; horregatik aurten, egitasmo zehatzak lantzen hasi aurretik, 2022an indarrak non jarri eta zeintzuk izan behar diren Tolosako politika publikoen lehentasunak aztertu nahi dugu herritarrekin” adierazi du Joseba Ormazabalek.

Denbora honetan, udal gobernuak datorren urtera begirako indar-fokoak zehaztu ditu, horiek teknikoki eta udal talde politikoekin kontrastatu dira. Orain tolosarren txanda iritsi da.

Udal Gobernuak zehaztutako indar-fokoak

“Aurtengo aurrekontuak ezohikoak izan dira, pandemiak eragindako beharrei erantzutera bideratu behar izan ditugulako udal balibideak hein handi batean, baina aurreikusitako proiektuak mantendu eta aurrera eramateko ahalegina ere egin dugu, bien arteko orekak mantenduz” adierazi du Ormazabalek.

Datorren urtera begira, ohiko aurrekontuak osatzea da udal gobernuaren helburua, egungo testuingurua eta honen bilakaera kontuan izanda.

Sailez sail eta egunez egun egiten den jardunaz gain, legealdi planean jasotako egitasmoak, eta etorkizunera begira eraiki nahi den Tolosa kontuan hartuz indar-fokoak zehaztu ditu gobernuak 2022 urterako:

  • Herritarren ongizatea eta gizarte kohesioa.

Herritarren ongizatea ikuspegi zabal batetik ulertuta, ez soilik gizarte zerbitzuei lotuta. Ondorengo gaiak barnebilduko lituzke: zaintza, berdintasuna, inklusioa, elkartegintza, elkarlana, ohitura osasungarriak, etxebizitza aukerak...

  • Tolosa biziberritzea, herri bizia helburu.

Hiri ekonomia indarberritzen jarraitzeko asmoz, garrantzia berezia izango dute datorren urtean azoka bereziek, kultur jarduerek, kirol arlokoek, naziaorteko ekimenek... zentzu horretan, estrategikoak diren egitasmoak ere bultzatuko dira merkataritza, ostalaritza, eta azokari lotuta, besteak beste, tokiko kontsumoa sustatzen jarraitzeko.

  • Pertsonak erdigunean kokatzen dituen Tolosa: atsegina, zaindua, beharreko azpiegiturekin.

Oinezkoei lehentasuna ematen eta espazioak herritarrentzat berreskuratzen jarraitzeko, hainbat proiektu eta egitasmoetan urratsak egiten jarraituko da.

  • Ingurumenaren zaintza eta jasangarritasuna, Aldaketa Klimatikoari aurre egiteko.

Tokikotasunetik ere erronka global honi erantzuna eman behar diogulako, lehentasunezkoa izango da garapen jasangarrirako helburuei jarraiki jada abiarazitako egitasmoak indartzea edota berriak martxan jartzea mugikortasunaren, trantsizio energetikoaren, alorretan.

  • Garai berrietara egokitutako Udala.

Zerbitzu eta izapide elektronikoetan eta gobernantza eredu berrietan sakonduko da, gobernantza irekiagoa, gardenago eta parte hartzaileago baten alde.

“Zehaztu ditugun indar-foko eta lehentasunak herritarrekin partekatu nahi ditugu, elkarlanean politika publikoak, aurrekontuak eta gure herriaren etorkizuna lantzen eta eraikitzen jarraitzeko” azpimarratu du Joseba Ormazabalek.

Nola parte hartu saioan

Ekainaren 22an abiatuko da beraz, 2022 urteko aurrekontu parte hartzaileen lehen fasea, indar-fokoen kontraste saioarekin. Saioa, ekainak 22, asteartea, egingo da, online, arratsaldeko 18:00etatik 19:30era.Saioan parte hartzeko beharrezkoa da aurrez izena ematea, (galdetegia beteta: https://labur.eus/2VqIf) luzapena eta gakoak jaso ahal izateko.

Tolosar guztiek parte hartu dezakete saio honetan zein prozesu osoan. Uda ondoren, saio tematikoak egingo dira herritarrekin indar-fokoen lanketatik abiatuta, proiektu eta egitasmoa zehatzagoak lantzeko.

Herritarrek zalantzarik badute, Gobernantza eta Komunitatea sailarekin harremanetan jar daitezke 010 telefonora deituta edota gobernantza@tolosa.eus helbidera idatzita.