Zerbitzu minimoak funtzio publikoaren greba-egunetan

• Maiatzaren 14n eta ekainaren 4an izango dira greba-egunak, eta Tolosako Udalak oinarrizko zerbitzuak bermatuko ditu

Tolosako Udalak gutxieneko zerbitzuak emango ditu ELA eta LAB sindikatuek funtzio publikoan deitutako greba-egunetan. Greba-deialdiak maiatzaren 14rako eta ekainaren 4rako dira, eta Alkatetzak, Eusko Jaurlaritzaren aginduari jarraituz, ezinbesteko zerbitzuak mantentzeko dekretua onartu du.

Etxez etxeko laguntza-zerbitzuan, II. eta III. mendekotasun-gradua duten erabiltzaileentzako arreta bermatuko da. Besteak beste, janari-zerbitzua, eguneroko higiene pertsonala, jaikitzeko eta oheratzeko laguntza, botiken eta elikagaien kontrola eta premiazko osasun-hitzorduetara laguntzea bermatuko dira. Era berean, eguneko zentroetara joateko laguntza emango da eta ohean dauden pertsonentzako beharrezko jarrera-aldaketak egingo dira.

Hezkuntza arloan, Samaniego ikastetxean sarrera-kontrola bermatzeko atezain-zerbitzu minimoak mantenduko dira; baita Eduardo Mokoroa Udal Musika Eskolan ere.

Horrekin batera, Andragora Tolosaldeko Emakumeen Etxean aholkularitza zerbitzua ere emango da.  

Garraioari dagokionez, Hiribusaren ohiko zerbitzuen % 30 emango da greba egunetan, eta lehentasuna emango zaie osasun-zentroetara doazen edo ordezko garraiorik ez duten lineei. Horrez gain, udal-errepideen mantentze-lanak bermatuko dira, jaiegunetako antolaketa berarekin, eta larrialdi-egoeretan, beharrezko garbiketa eta esku-hartzeak egingo dira. 

Udal garabi-zerbitzuak ere lanean jarraituko du, zirkulazioa oztopatzen duten ibilgailuak kentzeko eta desgaitasuna duten pertsonentzako aparkalekuak libre mantentzeko.