Tolosako Udalak irmo gaitzetsi nahi du herrian gertatu berri den eraso homofobo bortitza

• Gorroto, diskriminazio eta indarkeriaren adierazpen oro errotik gaitzesten du udalak
   

Joan den astelehenean, herritar bati indarkeriaz egin zioten eraso, eta irain homofoboak ere jasan zituen. Gisa horretako erasoek urratu egiten dituzte pertsonen askatasuna eta oinarrizko eskubideak, eta ez dute lekurik errespetuan, aniztasunean eta bizikidetzan oinarritutako gizarte batean.

Udalak elkartasun eta babes osoa helarazi nahi dizkie erasoa jasan duen pertsonari eta haren ingurukoei. Era berean, berriz ere adierazi nahi dugu errotik gaitzesten dugula gorroto, diskriminazio eta indarkeriaren adierazpen oro —sexu orientazioagatik zein genero identitate edo adierazpenagatik—. 

Lanean jarraituko dugu Tolosa herri aske, seguru eta askotarikoa izan dadin, eta pertsona guztiek sexu orientazioa eta identitatea askatasunez eta duintasunez bizitzeko aukera izan dezaten, beldurrik gabe. 

Horrez gain, udalak erasoa ikusi zuten herritarrei eskatzen die jar daitezela udalarekin harremanetan, informazioa osatzeko. 

Elkartasun, erantzukizun kolektibo eta errespetuarekin erantzungo diogu gorrotoari.