Tolosako Udalak Pasaiako erailketa matxista gaitzetsi du

• Tolosako Asanblada Feministak deitutako –gaur, 19:00etan Trianguloa plazan– gaitzespen-mobilizazioarekin bat egin dute udal ordezkari guztiek.

Tolosako Udalak bere gaitzespenik irmoena adierazi nahi du Euskal Herrian gertatu den azken erailketa matxistaren aurrean. Larunbatean, 53 urteko gizon batek 45 urteko emakume bat —bikotekide ohia— suzko arma batekin erail zuen Pasaian. 

Udalak, senide zein ingurukoei elkartasuna adierazteaz gain, hilketa salatzeko Euskal Herriko mugimendu feministak deitutako mobilizazioetan parte hartzeko deia egiten die herritarrei. Tolosako Asanblada Feministak astelehenean, abenduaren 2an, Trianguloa plazan 19:00etarako deitutako gaitzespen-mobilizazioarekin bat egingo dute Tolosako Udaleko ordezkariek.

2024. urtean indarkeria matxistak Euskal Herrian utzitako seigarren biktima da; zazpigarrena Euskal Herritik kanpo izandako emakume euskaldun baten hilketa kontuan izanda. 

Halaber, Tolosako Udalak herriko mugimendu feministarekin eta eragile sozialekin elkarlanean jarraituko du, indarkeria matxista desagerrarazteko borrokan, indarkeria matxistarik gabeko herri baterantz urratsak emanez. 

Horregatik, Udalak gogorarazi nahi du edozein motatako indarkeria matxista pairatzen duten emakumeek babes osoa dutela, eta Udalak eta Andragora, Tolosaldeko Emakumeen Etxeak eskura dituzten baliabide zein zerbitzuak eskainiko dizkietela. Gisa honetako erasoen aurrean, samina eta zero tolerantzia adierazi du Udalak.

Inauterietako bilera, beranduago

Gaur Inauteriak antolatzeko bilera deitua dago; bada, mobilizazioarekin bat egiten duenez, 19:00etan hasi beharrean, 19:15ean hasiko da bilera.