Bihartik aurrera eskuratu ahal izango dira abenduaren 31ko Elkartasun Kroseko dortsalak

• Samaniego eta Orixe ikastetxe publikoek antolatuta, abenduaren 31n egingo da krosa eta bildutako dirua Zutani Elkartera bideratuko da.

• Miren Larrarte Maioz pilotariaren kirol ibilbidea aitortuko dute antolatzaileek.

Urtero moduan, abenduaren 31n kirolak eta elkartasunak bat egingo dute urtea agurtzeko. Samaniego eta Orixe ikastetxe publikoetako kirol batzordeek udalaren laguntzaz antolatuta, XXVI. Elkartasun Krosa ospatuko da. Parte hartzaile kopuru altuenetakoa duen ekitaldietako bat da, ehunka korrikalari biltzen baitira. 

Aurten ere 1.000 dortsal jarriko dira salgai, bihartik aurrera, Shanti Kirolak dendan. Helduen dortsalek 10 euroko salneurria izango dute. 100 dortsal kadeteen mailakoentzat izango dira, eta horiek 5 euroko prezioa dute. Benjamin, alebin eta infantilen kasuan, ez da dortsalik beharko parte hartu ahal izateko. Saldu gabeko dortsalik balego, egunean bertan ere jarriko dira eskuragarri, Zerkausian bertan, 12 euroko prezioan.

Bildutako dirua, Zutani elkartearentzat

Krosak helburu solidarioa du. Hori dela eta, bildutako dirua pobrezia eta bazterkeria egoeran dauden pertsonen alde lan egiten duen Zutani elkartera bideratuko da. Tolosaldeko 200 bat familiari ematen die arreta, adin, kultura eta genero guztietako Tolosaldeko boluntario talde baten lanari esker. Justizia soziala lortzea, pobrezia desagerraraztea, gosearekin amaitzea, elikadura eskubidea bermatzea, emakume eta gizonen arteko berdintasuna sustatzea, emakume migranteak gizarteratzen eta ahalduntzen laguntzea edota elkarbizitza bultzatuz herria sentsibilizatzea dira, besteak beste, elkartearen helburuetako batzuk.

Abenduaren 31rako xehetasunak

Kirol proba 15:30ean hasiko da, haurren saioarekin. Zerkausia kalean izango dira irteera eta helmuga. Benjaminek parte hartuko dute lehenengo, 700 metroko lasterketa eginez. Alebin eta infantilek parte hartuko dute segidan, eta 1.400 metroko ibilbidea osatu beharko dute.

16:30ean izango da heldu eta kadeteen lasterketa. Kasu honetan irteera Plaza Zaharretik egingo da, eta helmuga Zerkausia kalean kokatuko da. 5.050 metroko ibilbidea egin beharko dute parte hartzaileek. 

Lasterketak amaitu ahala egingo da sari banaketa Zerkausian. Iaz bezala, Tolosako ikastetxe publikoek elkarlanean diseinatutako eta sortutako trofeoak banatuko dira. Hain zuzen, Orixeko ikasleek diseinatu dituzte, eta Lanbide Heziketako ikasleek ekoiztu. Mozorrorik onenak ere saria izango du. Horrez gain, parte hartzaile guztiek domina jasoko dute eta kamisetak zozkatuko dira.

Urtero moduan, kirolari bat ere aitortuko dute Samaniegok eta Orixek. Aurten, Miren Larrarte Maioz pilotariari egingo diote aitortza, bere kirol ibilbide eta lorpenengatik. Bere dedikazio, ahalegin eta pilotarekiko grina inspirazio iturri direla nabarmendu dute antolatzaileek.