Irene Caminosen agurreko erakustaldia ospatuko da, larunbatean, urriak 12, Euskal Herria plazan

• Caminos berak ez ezik, beste hamalau pilotuk ere parte hartuko dute erakustaldian, 16:30etik 20:30era bitarte.

13 urtez nazio eta nazioarte mailan onenen artean lehiatzen aritu ondoren, Irene Caminosek agur esango dio kirol mailako bere ibilbideari. Oraindik ere txapelketa batzuk lehiatzeko falta bazaizkio ere, larunbatean, hilak 12, bere agurreko ekitaldia ospatuko da Tolosan. 

Ekitaldi berezi hau, gainera, pilotu tolosarraren «ametsetako bat» egi bihurtzeko aukera ere izango da. «Euskal Herria plaza trial erakustaldi bat egiteko leku ederra zela uste izan dut beti, eta ez nuen hori bizi gabe agur esan nahi. Udalari proiektua aurkeztu, eta begi onez ikusi zuen. Festa moduko bat izango da larunbatekoa, baina gure kirola are ikusgarriago egiteko ere balioko du», azaldu du Caminosek.

Caminosek bere ibilbidean lagun izan dituen beste hamalau pilotu ere gonbidatu hitzordura. Emakumezkoen artean, Paula Rolland, Vera Bron eta, Alba Hidalgo; gizonezkoen artean, berriz, Eloi Palau, Toni Guillem, Marc Novoa, Sergi Llogueras, Ion Areitio, Javi Alonso, Jesus San Martín, Borja Conejos, Dani Barón, Antonio Fraile eta Gorka Susperregi izango dira.

Zirkuituak lau zona izango ditu, eta proba bat baino gehiago egin beharko dituzte guztiek. Honakoak dira ekitaldiaren gutxi gora beherako ordutegiak.
 

• 16:30-16:40 | Ekitaldiaren hasiera eta proben inguruko azalpenak.

• 16:40-16:55 | Pilotuen aurkezpena, bakoitzaren lorpenen aipamena.

• 16:55-18:30 | Proba erabakigarriak (bina itzuli lau zonatan).

• 18:30-19:00 | Atsedena eta puntuazioen kalkulua.

• 19:00-20:00 | Finala (zona bakoitzean itzuli bat).

• 20:15 | Sari banaketa, Irene Caminosi elkarrizketa eta agurra.

Mundu mailan erreferente

Irene Caminos Yarza 1998ko abuztuaren 26an jaio zen Tolosan, eta 13 urte eman ditu elite mailan lehiatzen, trial modalitatean. Bere ibilbidean lorpen esanguratsuak ditu, horien artean zortzi Euskadiko Txapelketa, Espainiako lau Txapelketa, 2017an munduko txapelketako brontzezko domina, eta 2018an Txinan taldeka lortutako Munduko Txapelketa.

«Ezbairik gabe Tolosak izan duen kirolari erreferenteetako bat izan da, eta da oraindik ere. Baina lorpenetatik harago, kirol minorizatu bat ikusgarri egin eta oihartzun handia eman dio, baita Tolosatik kanpo ere. Bidea bere kabuz hasi zuen, gainera, eta orain gaztetxo gehiago batu ditu albora. Zoriondu eta eskertu nahi nuke, Tolosako herriaren izenean, urte hauetako ahalegin hori»