Tolosako Udalaren berriak WhatsApp bidez jasotzeko aukera izango da aurrerantzean

• Norabide bakarreko kanala da; hau da, harpidetzen diren erabiltzaileek udalak bidalitako mezuak soilik ikusi ahal izango dituzte: azken berriak, alertak…

• 2025etik aurrera, Gabonen ostean, abiatuko da zerbitzua, euskaraz nahiz gazteleraz, eta badago jada kanaletara harpidetzeko aukera, tolosa.eus-en.

Tolosako Udalaren berriak telefono mugikorrean jaso ahal izango dira aurrerantzean. Difusio kanalak sortu dira WhatsApp-en, herritarrekin komunikatzeko bide zuzenago eta bizkorrago bat eskaintzeko helburuarekin. 

Udalari eta udalerriari lotutako aktualitatearen berri emango da WhatsApp bitartez. Hau da, udaleko berri garrantzitsuenak ez ezik, alertak, mugikortasunari lotutako abisuak edo intzidentziak ere jakinaraziko da.  

Norabide bakarreko kanalak dira; hau da, soilik udalak bidalitako mezuak ikusi ahal izango dituzte harpidetzen diren erabiltzaileek, ez beste inorenak. Pribatutasun ikuspegitik, gainera, inork ezingo du jakin nor dagoen kanalean harpidetuta. 

Gabonak pasa ostean hasiko da zerbitzua, baina badago jada kanaletara harpidetzeko aukera. Bi aukera daude, euskarazkoa eta gaztelerazkoa. 

• Euskaraz: https://whatsapp.com/channel/0029VavPmihFi8xbgpxVtG2E 

• Gazteleraz: https://whatsapp.com/channel/0029Vb0IFCkAInPcjgRgiL2B

Honako urrats hauek jarraitu behar dira harpidetzeko:

1. Sartu dagokion kanalean, goian zehaztutako esteketako batean klikatuta. Euskarazko kanala lehenesteko dei egiten du udalak.

2. Behin kanalaren barruan egonda, onartu harpidetza.

3. Jakinarazpenak aktibatzeko, sakatu goian agertzen den kanpaia.

4. Edozein unetan eman daiteke baja, kanalaren ezarpenetatik.