Landareak eta loreak ere banatzen hasiko da Azokako etxez etxeko zerbitzua

• Larunbatean ez ezik, astean zehar ere inguruko baserrietako produktuak eskuratzeko aukera ematen du zerbitzuak, 12 ekoizleren parte hartzearekin.

Telefonoz, WhatsAppez edo emailez ekoizle bakoitzari eskaria egin eta etxean bertan jaso. Eroso, sinple eta azkar. Konfinamenduak bide berrien aldeko apustua egitea bultzatu ditu sektore ezberdinak, baita gure ekoizleak ere, eta herritar askok eta askok jada bide hori hautatu dute bertako produktuak eskuratu ahal izateko.

Hiru aste dira “Azoka, zure etxera” egitasmoa abiatu zela, etxez etxeko zerbitzua ahalbidetzeko; bada, egonkortuz doa, gero eta erabiltzaile gehiago eta eskaintza zabalagoa baititu.

Hamabi dira zerbitzuan parte hartzen duten ekoizleak, eta aste honetatik aurrera, udaberri bete-betean, lore eta landareak ere eskuragai izango dira, Berdura Plazan jarri ohi diren ekoizleen eskutik. Larunbatero-larunbatero eguneratzen da parte hartzaileen zerrenda, eta Tolosako Azokako sare sozialetan eta udaleko webgunean ematen da horren berri.

Ahal den neurrian zerbitzu hau hobesteko dei egin du udalak, guztiek presentzialki egoteko aukerarik ez dutenez, ekoizle guztiei beren produktuak merkaturatzeko aukera eskaintze aldera.

Postuen arteko errotazioa Zerkausian

Larunbateko azokak ere aldaketa txikiak izango ditu. Prebentzio eta segurtasun neurriak direla eta, ezinezkoa da Zerkausian postu guztiak kokatzea, horregatik txandakako sistema jarri da martxan.

Hori horrela, joan den astean egon ziren zazpi postu berri izango dira larunbat honetan Zerkausian. Aste honetan parte hartuko ez duten 7 postu horietako batzuk, “Azoka, zure etxera” zerbitzuaren bidez, etxez etxeko banaketa eskaintzen jarraituko dute, eta hortaz, eurei produktuak erosteko aukera izango da bide hori erabiliz.

Esker mezua

Egoera berria izanik, neurri eta protokoloetara egokitzea erraza izan ez bada ere, ekoizle, herritar eta udal langile guztiak, merkataritza, azoka eta turismoa sailekoak, hirigintzakoak, brigadakoak eta udaltzaingoak, babes zibil eta TAOko langileen laguntza eta lana txalotu eta eskertu nahi ditu udalak.

Oro har, jendea ardura handiz ari da neurriak errespetatzen, eta horrek azoka modu seguruan egin ahal izatea ahalbidetzen du. Normaltasunera itzuli artean, neurriok mantenduko direla gogoratu udalak, eta orain arteko jarrera onari eusteko dei egin die herritarrei.