2019ko sanjoanak iragartzeko kartelak aurkezteko epea igande honetan amaitzen da, maiatzak 5

• Seigarrenez antolatu da lehiaketa. Irabazleak 500 euro eskuratuko ditu sari gisa.
• Kartelak fitxategi digital batean Tolosako Udalak bere webgunean (www.tolosa.eus) horretarako prestatutako aplikazioaren bitartez aurkeztu behar dira.

Tolosako Udaleko Kultura, Jaiak eta Gazteria sailaren 2019ko San Joan jaiak iragartzeko kartel lehiaketa abian da eta igande honetan, maiatzak 5, amaituko da lanak aurkezteko epea. Seigarren edizioa du lehiaketak eta nahi duen orok har dezake parte. Kartelak fitxategi digital batean Tolosako Udalak bere webgunean (www.tolosa.eus) horretarako prestatutako aplikazioaren bitartez aurkeztu behar dira. Aplikazio horretan kartel bakoitzari zenbaki bat esleituko zaio eta zenbaki hori izango da epaimahairentzat kartelaren identifikatzailea.

Honako baldintza hauek dira bete beharrekoak:

• Sanjoanak 2019, ekainak 21-24 / TOLOSA izango da kartel guztietan agertuko den testua.

• Tolosako Udalarenlogotipoa integratua behar du eraman.

• Obra horiek, ideia nahiz edukiari dagokionez, originalak izan beharko dute.

• Neurri bertikala izan beharko dute: 50x70 zentimetro, eta gutxienez 300 ppp-ko erresoluzioa eta gehienez 5MBkoa.

• Kolorea eta teknika aukerakoa.

• Generoen irudikapenean erabilitako irudiek oreka bilatuko dute, rol eta estereotipo tradizionalak azpimarratu gabe, eta sexu, arraza, adin, kultura edo sexu-aukeraren arloan diferentzien tratamendu gutxiesgarria ekidinez.

• Fitxategiaren izenean leloa jarri behar da.

Epaimahaia Kultura, Jaiak eta Gazteria departamentuak izendatuko du. Lehiaketara aurkeztutako kartel guztien artean epaile taldeak aukeratutako sail bat jendaurrean erakutsiko da, Antonio Maria Labaien kultur etxeko aretoan. Aukeratutako lan hauen artetik aterako da irabazlea, herritarren botoek erabakita. Botoak kultur etxean bertan edo www.tolosa.eus web orrialdean eman ahalko dira. Honakoa izango da kronograma:

• 1. fasea: lehiaketara aurkeztea: apirilaren 12tik maiatzaren 5era.

• 2. fasea: 6 kartelen aukeraketa. Epaimahai batek aurkeztutako lan guztietatik 6 aukeratuko ditu: maiatzaren 6tik maiatzaren 10era.

• 3. fasea: bozketa publikoa. 6 hautagaien bozketa publikoa herritarren artean: maiatzaren 13tik 26ra.

• 4 fasea: kartel irabazlearen iragarpena: maiatzak 27.

Oinarriak osotasunean www.tolosa.eus -en (atxikita*).

Norbaitek informazio gehiago beharko balu, Kultur etxera jo dezake, 943 670 388 telefonora deitu edo kultura@tolosa.eus -era idatzi.