Kabi Alai Kuttuna eta Inauterietako kartela batera aurkeztuko dira, herritarren aurrean, ostegunean

• Ekitaldi irekia egingo da, lehen aldiz, urtarrilaren 18an, 19:00etan Zerkausian
• Kabi Alai txarangak girotuko du aurkezpena, eta Inauterietako kartelaren aleak banatuko dira gerturatzen direnen artean

Nor edo nortzuk ote dira Ostegun Gizeneko txupinazoa botatzeko ardura izango duten Kabi Alai Kuttunak? Nolakoa ote da aurtengo Inauterietako kartela? Ostegun iluntzean argituko dira bi galdera horien erantzunak, herritarren aurrean aurkeztuko baitira biak, aldi berean. 

Kabi Alai elkarteak eta Tolosako Udalak elkarlanean antolatuta, aurkezpen ekitaldi bateratua egingo da, lehen aldiz. Zerkausian izango da, hilaren 18an, 19:00etan.

Ekitaldia Kabi Alairen Ostegun Gizeneko udalbatzako alkate eta zinegotziek gidatuko dute, eta bertan izango dira aurtengo kartelaren egilea eta Kuttuna. 

Ekitaldi laburra izango da eta, amaitzean, kartelaren aleak banatuko dira doan gerturatzen direnen artean. Ondoren, eta ostegun arratsaldea girotu asmoz, elkarteko txaranga kalez kale ibiliko da, Inauteriak ate joka direla iragartzeko. Kartelaren aleak sobratuko balira, kalejiran joan ahala gerturatzen diren herritarrei ere banatuko zaizkie.

Ostiraletik aurrera, berriz, herriko saltoki eta tabernetan ere banatuko dira kartelak; kultur etxean ere ale gehiago jarriko dira eskura.