100 auto klasiko baino gehiago ikusteko aukera, irailaren 23an

• Tolosatik igaroko da, hurrengo larunbatean, San Sebastian Circuit Spirit auto klasikoen bira.
• Sei auto Plaza Zaharrean izango dira ikusgai eguerdian eta, gainerakoak, San Estebango aparkalekuan.

San Sebastian Circuit Spirit, auto klasikoen bira, irailaren 22an hasiko da. Asteuburu osoan zehar Gipuzkoatik barrena ibiliko dira, eta Tolosatik ere igaroko da, irailaren 23an. 100 auto klasikotik gora batuko dira 6. edizio honetan.

Larunbat eguerdian iritsiko dira auto klasikoak Tolosara, Bentaunditik sartuta. Zuzenean San Estebango aparkalekura joango dira, eta han gertutik ikusteko aukera izango da. Horietako sei auto, berriz, Plaza Zaharrean jarriko dira ikusgai.

Ondoren Ferialekuan bazkalduko dute, bertako produktuak dastatuz, eta bazkalostean birarekin jarraituko dute. Tolosako erdigunea zeharkatuko dute: hala nola, San Frantzisko pasealekua, Nafarroa Etorbidea, Santa Klara eta Ibaiondo kaleak, eta Larramendi zubia igaroko dituzte, eta Anoetarantz joango dira ondoren.