-
Azaroaren 14tik 17ra ospatuko da Tolosako Babarrunaren Festa: azoka bereziaz gain, lau lehiaketa izango dira.
-
Tolosako Babarruna Elkarteak 25. urteurrena beteko du
Jendetza bildu zen Tolosan joan den urteko Tolosako Babarrunaren Festaren eta Euskal Jaiaren aitzakian. Arrakasta erabatekoa izan zen: jende asko, giro paregabea... Olatz Peon alkatearen esanetan, “herritarren, eta bereziki, gazteen parte hartzea ikaragarria izan zen”. Bada, arrakasta horri eustea erronkatzat hartuta, aurkeztu dituzte 2019ko Babarrun Festa eta Euskal Jaia.
Bertako produktuekin, ikastaroa
Pul-pul jardunaldiak emango dio hasiera festari, azaroaren 14an. Aurten itxuraldatuta dator, gainera, publikoaren parte-hartze aktiboa sustatze aldera, hitzaldi formatua alboratu eta sukaldaritza-ikastaro bihurtuko baita. Ama Tabernako Javi Rivero eta Gorka Ricok bertako produktuekin errezetak prestatuko dituzte, bakoitzaren jatorri eta ezaugarriak azalduz. 15 lagunentzako lekua izango da, eta interesatuek komunikazioa.tbk@gmail.com helbidera idatzi beharko dute izena emateko.
Hiru lehiaketa larunbatean
Larunbata, azaroaren 16a, izango da egunik garrantzitsuena. Azoka bereziarekin batera, hiru lehiaketa izango dira egun horretan. Goiztiarrena XXXII. Tolosako Babarrunaren Ekoizleen Lehiaketa izango da. Sukaldariak 06:30ean hasiko dira babarrunak prestatzen, eta 12:15ean emango du epaimahaiak bere erabakiaren berri. 12:45ean, San Blas Elkarteak antolatutako XXVII. Odolki Lehiaketaren sari banaketa izango da. Bien bitartean, 10:15etik 13:00etara, Euskal Herriko XI. Frisoi Txapelketa izango da Ferialekuan.
Musika, dantza eta jaia
Eguna girotzeko, Benta Zaharreko Mutiko Alaiak, Udaberri Dantza Taldea eta Erraldoi eta Buruhandien Konpartsa ibiliko dira, kalez kale.
Arratsaldean, Euskal Jaiaren barruan, joan den urtean estreinakoz egindako bi saio errepikatuko dira. Oihana Iguaran eta Agin Laburu bertsotan izango dira Beti-Alai jatetxeko balkoian; beranduago, Joxe Elorza eta Iñaki Larrañaga trikitilariek egingo dute saioa, Orbela tabernako balkoietatik. Jainekin Txarangak, DJ Txurruk eta Gozategi taldeak girotuko dituzte kaleak, iluntze eta gau partean.
Eta, nola ez, egunari dagokion kolorea emateko, Tolosako Babarrunaren Kofradiak euskal jantziak erabiltzeko deia luzatu du.
Bazkari herrikoia
Igandeko Gure Kaiola elkarteak antolatutako bazkari herrikoiak emango dio itxiera Tolosako Babarrunaren Festari. Txartelak salgai dira jada, elkartean bertan, 600 859 683 telefono zenbakian edo gurekaiola@hotmail.com helbidean, 27 euroren truke. Aurrez, Tolosako Babarrunaren Lehiaketa Gastronomikoa izango da. Bikoteka banatuta, 08:00etan ekingo diote lanari parte hartzaileek, eta irabazleen izen-abizenak bazkalostean emango dituzte ezagutzera.
Kate oso baten lana
Babarruna da festaren oinarri nagusia, baina baserritarrek eta eragileek egindako lanik ez balego, ez genuke festarik, ezta perla beltzarik ere. Bide horretan, “eskualdeko baserritarren lana” goraipatzearekin batera, Babarrunaren festa kate baten erakusleiho ere badela azpimarratu du alkateak: “Elikaduraren kate honetan, ekoizleak ezinbestekoak dira; baita gure azoka ere, tokiko produktuak saldu eta erosteko. Noski, sukaldariak, profesionalak eta etxekoak. Eta festa hau posible egiten duten eragile guztiak: Babarrun Kofradia, Gure Kaiola, San Blas, Tolosako sukaldariak eta Babarruna Elkartea”.
Hain zuzen, azken honek 25. urteurrena beteko du aurten. Kontsumitzaileari jatorriaren eta kalitatearen ziurtagiria duen produktua eskaintzeko helburuarekin hasi zuen bere ibilbidea elkarteak, eta egun 37 ekoizlek osatzen dute. 20.000 kiloko ekoizpena lortzen dute urtean, eta aurtengoari dagokionez honakoa nabarmendu du Xabier Goikoetxea elkarteko gerenteak: “Berantiarra da, baina ona, osasungarria, eta aurreko urtekoa baino hobea. Azkarrago egosten da, eta salda hobea ematen du, finagoa”.
Egitaraua
AZAROAK 14
18:00. Pul-pul jardunaldia: 'Bertako produktuak, platerera', Sukaltalka espazioan. Eserleku-kopurua: 15. Lekua gordetzeko, helbide honetara idatzi: komunikazioa.tbk@gmail.com
AZAROAK 15
19:30. Tolosako babarrunaren ohorezko kideen izendapena, Tolosako udaletxeko pleno aretoan. Ekitaldi irekia.
AZAROAK 16
06:30. XXXII. Tolosako Babarrunaren Ekoizleen Lehiaketaren hasiera Trianguloa plazan
08:00. San Blas Elkarteak antolatuta XXVII. Odolki Lehiaketaren hasiera San Franzisko pasealekuan
09:00-14:00. Azoka berezia Trianguloa plazan
10:15-13:00. Euskal Herriko XI. Frisoi Txapelketa, Ferialekuan
11:00. Tolosako Babarrunaren Ekoizleen Lehiaketako epaimahaiak bere lanari ekingo dio, Trianguloa plazan
11:00. Dantza ikuskizuna Udaberri taldearen eskutik, Trianguloa plazan, eta ondoren, kalejira, “Bentazaharreko Mutiko Alaiek” lagunduta, Tolosako kaleetan barrena
11:15. Erraldoiak Trianguloa plazan
12:00. Tolosako Babarrunaren Kofradiaren eskutik, Tolosako babarruna jateko aukera, Trianguloa plazan
12:00. Tolosako eta Lazkaoko trikitixa ikasleen kalejira Asier Gozategiren eskutik.
12:15. Tolosako Babarrunaren Ekoizleen Lehiaketako sari banaketa, Trianguloa plazan
12:45. XXVII. Odolki Lehiaketako sari banaketa
13:00. Euskal Herriko XI. Frisoi Txapelketako sari banaketa
14:30. Tolosako elkarte eta tabernetan babarrun jatea
18:00. Oihana Iguaran eta Agin Laburu bertsotan, Beti-Alai jatetxeko balkoian
18:30. Jainekin txaranga, Maria Luisa Agirre doktorearen plazatik hasita
19:15. Joxe Elorza eta Iñaki Larrañaga Orbelako balkoian; ondoren, kalejira trikitilariekin Euskal Herria plazara
20:00-22:00. DJ TXURRU, Euskal Herria plazan
23:00. Gozategi, Plaza Berrian
00:30. Jainekin Txaranga, Plaza Berrian hasita.
AZAROAK 17
08:00. Gure Kaiola elkarteak antolatuta, XXXIII. Tolosako Babarrunaren Lehiaketa Gastronomikoaren hasiera, Trianguloan.
13:00. Tolosako Babarrunaren Lehiaketa Gastronomikoko epaimahaiak bere lanari ekingo dio, Trianguloa. plazan
14:30. Herri bazkaria, Zerkausian
* Oharra: Bazkariko txartelak salgai Gure Kaiola elkartean, 27 €-ren truke (16 urtetik behera 15€), astelehenetik ostiralera, 19:30etik 21:00etara, azaroaren 4tik 16ra; 600 859 683 telefonoan; edo gurekaiola@hotmail.com helbidean.
16:30. Tolosako Babarrunaren Lehiaketa Gastronomikoko sari banaketa, Zerkausian.
