Eguzkiak eta udaberri itxurako tenperatura epelek Kaldereroteako larunbateko giro bikaina eta jai girokoa aurreratu zuten. Produktu ugari zegoen barazki postuetan, tolosarrok aurretik ditugun festa egunak modu osasuntsuago batean eramaten lagunduko dutenak, eta ezbairik gabe, herriko biztanleen osasuna probintziako anbulatorioetako eta ospitaletako mailetara eramateko modukoa ia.
Denok geunden harrituta eguraldiarekin. Ez gaude ohituta otsailean mauka motzean ibiltzen, eta hare gutxiago Tolosako kaleetan dauden gereziondoak lorez beteta ikusten, martxoaren amaieran Kyotoko filosofoaren pasealekua egoten den bezala. Dena dela, ez dugu berriz aldaketa klimatikoaren gaia aterako. Egoera testuinguruan jartzeko eta fenomeno hau aurrez ere gertatu izan dela ikusteko, zer hoberik esaera zaharretara jotzea baino: “Kandelariatan tximeleta ikustea baino, artaldean otsoa ikustea hobe”. Lehenago edo beranduago iritsiko den hotz, izotz eta elur denboraleari keinu egiten dio esaldiak, eta, dudarik gabe, loraldi betean edo ernetzean daudenean iritsiko da, eta sortutako kaltea are handiagoa izango da. Ikusiko dugu ea esaera zaharrak dioena betetzen den eta neguko kolpe gogorra iristen den, Zerkausiko ekoizle beteranoek zioten bezala. 1993ko otsailaren 28an bi arreko elurtea egin zuen gauean, Kandelariatan tximeleta ikusi ondoren.
Edonola ere, eta meteorologiak egindako opari gisara, larunbatean bertako ilarraz gozatu ahal izan genuen, aurreko astean iragarri bezala, Nestor Errastik 250 gramo eraman baitzituen azokara. Dirudienez bere ekoizpena egonkortu egin da, eta inauterietako larunbaterako gehiago ekarriko omen du, 14€-an saltzeko.
Azken egunetako eguraldi ona tarteko, azaloreak eta romaneskuak hazi egin direla ikus ahal izan genuen larunbatean. Hotzik ez badu egiten, ekoizpenak ez du askorik beharko lehorragoa eta zailagoa izateko. Beraz, goza dezagun ahal dugun denboran. Imazek bere postuan eskaini zuen produktu sortak ere atentzioa eman zuen larunbatean. Kaleak, pack choi-a edo apioa zituen, eta baita mihilu freskoa eta mihilu haziak ere, bertako oreganoa edo edozein errezetari beroa gehitzeko txile lehorrak ere. Londresko Leonard-ek zioen moduan “Highly recommended”.
Garai honetako bete izar bat fruta eskaintza da. Kalitate handiko sagar asko, sagarrekin egindako zukua, kiwiak, kakiak edo udareak oso ohikoak dira erosleen saskietan. Sagarren ekoizpenera diharduten ekoizleei erosteko gonbita egiten diegu, Errezildik edo Antzuolatik joaten direnak, esaterako, kalitate bikaineko sagarrak iritsi baitziren.
Baratzezaintzan aritzeko afizioa dutenentzat, profesionalak ia jakitun baitira eta dagoeneko badira aste batzuk hortan dabiltzala, dagoeneko eskuragai daude kristalen plazan marrubi, tomate, letxuga eta porru landareak. Ez egon zain, eta hartu aurre zuen bizilagunei ea nork lortu lehenago lehen uzta.
