Urteko lehen udal aldizkaria kalean da

• Tolosako Udalak 2019-2023 Legealdirako Kudeaketa Planari buruzko aldizkaria argitaratu berri du. Dokumentua etxe guztietara banatu da eta udal eraikinetan ere eskuratu daiteke, Legealdirako Kudeaketa Plana bezalaxe.

Abenduaren hasieran ekitaldi ireki batean aurkeztu eta banatu zitzaien herritarrei 2019-2023 Legealdirako Kudeaketa Plana.

Dokumentua udal webgunean kontsultatu daiteke eta interesa duten tolosarrek udal eraikin ezberdinetan ere eskuratu dezakete, esaterako, UDATEn, Kultur Etxean edota Musika Eskolan.

Urteko lehen aldizkaria Legealdi Planari buruzkoa

Legealdirako Kudeaketa Planaz baliatu da udala urteko eta legealdi berriko lehen aldizkaria argitaratzeko.

Eraginkortasunean urratsak egiteko udaletxean ezarri den egitura berria azaltzen da, lehenik eta behin, udal aldizkari ale berrian, honen baitan garatu baitu talde politiko-teknikoak Legealdirako Kudeaketa Plana.

Halaber, Kudeaketa Planak zein helburu dituen, zertarako balio duen eta zein xede, ikuspegi eta balioei erantzuten dien ere azaltzen da aldizkarian eta bereziki, datozen lau urteetan aurrera eramango diren egitasmo eta proiektu nagusiak aletzen ditu.

Udal aldizkari berria, itxura aldatuta

Udal aldizkariak ere aldaketak izan ditu, aurreko aldizkariak baino orrialde kopuru gutxiago du, paper birziklatua erabili da eta irudiari eman zaio garrantzia, aldizkaria erakargarriagoa eta bereziki, irakurterrazagoa izan dadin. Tribuna eta agenda atalak mantendu dira eta azken berriak atala sortu da; azkenik, kontra-azala udaletik herritarrei eskainitako zerbitzuak ezagutarazi eta indartzeko erabiliko da.

Lehen ale honetan, adibidez, UDATE, Herritarren Arreta Zerbitzuari buruzko informazioa jaso da, tolosarrek zein ordutegitan eta zertara jo dezaketen Udatera jakin dezaten.