Valentziara laguntza Tolosatik: material bilketa, gaur eta bihar, kultur etxeko areto nagusian

• Material bilketa egingo da kultur etxeko areto nagusian, gaur arratsaldean eta bihar egun osoan zehar, eta asteazkenean bidaliko da.

• Tolosako Udaltzaingoko eta Herri Babeseko talde bat Picanyara abiatuko da, udalak utzitako baliabideekin hondakinak kentzen laguntzera.

Tolosako Udalak bat egingo du Mediterraneoan uholdeek eragindako kalteei aurre egiteko elkartasun sarearekin, eta laguntza bideratuko du datozen egunotan. Valentziako Udalerrien eta Probintzien Federazioak eta Picanyako Udalak goizean egindako eskaera ofizialari erantzunez, eta bi erakunde horiekin koordinatuta, laguntza modu ezberdinetara bideratuko da.

Tolosako talde bat, Valentziara

Alde batetik, Tolosako Udaltzaingoko eta Herri Babeseko talde bat Picanyara joango da, asteazkenean, bost egunez bertako udaltzainekin elkarlana egitera. Hondakinak garbitzen lagunduko du, eta Tolosako Udalak utzitako ibilgailu eta materialak erabiliko ditu: pilatuta geratu diren autoak mugitzen laguntzeko aproposak diren bi ibilgailu, ura xurgatzeko makineria eta materiala garraiatzeko brigadaren kamioi bat eramango dituzte. 

Material bilketa, gaur eta bihar

Bidaia baliatuz, Valentziako Udalerrien eta Probintzien Federaziotik eskatu duten materiala ere bidaliko da bertara. Horretarako, material bilketa egingo da, gaur arratsaldean eta bihar egun osoan zehar.

Kultur etxeko areto nagusia izango da materiala uzteko puntua. 10:00etatik 13:00etara eta 16:00etatik 20:30era izango da horretarako aukera. Honako materialak jasoko dira:

• Ura
• Esnea
• Latako elikagaiak
• Norbere edo etxeko garbiketarako produktuak
• Fardelak eta konpresak
• Uretako bota edo katiustak (berriak)
• Segurtasun pertsonalerako produktuak: musukoak, eskularruak…
• Hondakinak jasotzeko palak

Guztia modu egokian kudeatu ahal izateko, zerrenda horretan ez dagoen bestelako ezer ez eramateko eskatzen da.