Tolosako Udalak Bilboko erailketa matxista arbuiatu du

• Udalbatzak aho batez onartu du gaitzespen mezua, eta Tolosako Asanblada Feministak deitutako elkarretaratzearekin bat egingo du.

Tolosako Udalak bere gaitzespenik irmoena adierazi nahi du Euskal Herriko azken erailketa matxistaren aurrean. Ostegunean Bilbon bere bikotekideak eraildako emakumearen familiarekiko eta gertukoekiko elkartasuna adierazi nahi du Udalak. 

Era berean, udalak bat egingo du, Tolosako Asanblada Feministak larunbatean 12:00etarako deitutako gaitzespen-mobilizazioarekin eta dei egiten die herritarrei parte hartzera, Euskal Herrian aurten izan den hirugarren hilketa matxista baita. 

Halaber, Tolosako Udalak, herriko mugimendu feministarekin eta eragile sozialekin elkarlanean, indarkeria matxista desagerrarazteko borrokan jarraitzeko konpromisoa berresten du, indarkeria matxistarik gabeko herri baterantz urratsak emanez. Horregatik, Udalak gogorarazi nahi du edozein motatako indarkeria matxista pairatzen duten emakumeek babes osoa eta Tolosako Udalak eta Andragora, Tolosaldeko Emakumeen Etxeak eskura dituzten baliabide zein zerbitzuak eskainiko dizkiela. Gisa honetako erasoen aurrean, samina eta zero tolerantzia adierazi du.