Biharko ezohiko azoka bertan behera

• Jaso berri den Osasun Ministerioaren dekretuaren arabera, aurrerantzean, kale-salmenta galerazita dago eta beraz, ezohiko neurriak hartuta ere, ezingo da bihar tokiko ekoizleen elikagaien salmentarik egin kalean.

Gaur eguerdian jasotako Osasun Ministerioaren azken aginduei jarraiki, bihar ez da aurreikusia zegoen ezohiko azokarik gauzatuko.

Azken jarraibideen arabera, kale garbiketa desinfektatzaileekin gauzatu behar da eta beraz, aurrerantzean, kale salmenta galerazita dago. Gauzak horrela ezinezkoa izango da bihar tokiko ekoizleen eligaien salerosketa egitea, arestian aipatutako arrazoiengatik.

Agindua jaso bezain pronto, bertan behera utzi du Udalak Zerkausiko elikagaien salmenta eta hala jakinarazi zaie ekoizleei.

Kale garbiketari dagokionean, udala dagoeneko hasia da herriko zenbait gune produktu desinfektatzaileekin garbitzen: saltoki eremuak eta anbulatorioa, batez ere. Datozen egunetan, azken aginduaren arabera, kale guztiak desinfektatuko dira.

Udaletik argi utzi nahi izan dute segurtasun eta osasun berme guztiekin gauzatzekoak zirela ezohiko azoka, udal ordezkari guztien adostasunarekin, protokolo zorrotz batekin, eta Osasun sailaren oniritzi eta baimenarekin.

Azken berriak direla eta, eta orain arte bezala, arduraz jokatuz, bertan behera utzi da ezohiko azoka eta udalak egunero-egunero beharrezkoak diren neurriak aztertu eta hartuko ditu Prebentzio Mahaian, udal honen lehentasuna delako tolosar guztien osasuna bermatzea.