Udaten web bidez hitzordua eskatzeko aukera, martxan

• Webgunearen bidez hitzordua eskatu eta gero, udala 24 orduko epean jarriko da harremanetan eguna eta ordua adosteko, eta erabiltzaileak egin beharreko izapiderako behar duen dokumentazioa zein den azaltzeko.

Udaten, Tolosako Udaleko Herritarren Arreta Zerbitzuan, hitzordu presentziala webgunetik eskatzeko aukera eskainiko du aurrerantzean tolosa.eus atariak. Aukera berri honek udal tramiteak azkarrago eta erosoago egitea du helburu, itxaronaldiak saihestuz eta prozesua eraginkorragoa eginez. 

Nola eskatu hitzordua?

Webgunean, orrialdearen azpiko eskuineko aldean ‘Hitzordua eskatu’ botoia aurkituko duzu. Botoi hori sakatu ondoren, galdetegi bat bete beharko da. Formularioa osatu eta 24 orduko epean (egun baliodunetan) zehaztutako telefono-zenbakira deituko du udalak, egindako kontsultari erantzuteko edota hitzorduaren eguna eta ordua berresteko. 

Aldaketa honek hiru helburu ditu:

• Herritarraren erosotasuna bermatzea: behin udaletxera etorrita, itxarote denborak saihesteko hitzordua aurrez hartzea gomendatzen da.

• Eraginkortasuna hobetzea: hitzordua baieztatu ondoren, Udatek ekarri beharreko dokumentazioa zein den jakinaraziko du, izapidea bisita bakarrean egin ahal izateko.

• Zerbitzu pertsonalizatua: hitzorduaren arrazoia zehaztu beharko da telefonoz, eta, horrela, behar duzun dokumentazioa eskura izatea erraztuko zaizu, zure bisita ahalik eta ondoen prestatzeko.

Kontaktua eta informazio gehiago:

Informazio gehiagorako edo hitzordua eskatzeko, bisitatu udal webgunea edo jarri harremanetan Tolosako Udate bulegoarekin.